डीडीयू: UGC के क्रेडिट-फ्रेमवर्क पs संचालित होई 4 ईयर ग्रेजुएशन प्रोग्राम: विद्या परिषद के मीटिंग में लिहल गइल कइयन गो महत्वपूर्ण फैसला, सेंटर फॉर डिस्टेंस एजुकेशन के होई स्थापना
दीनदयाल उपाध्याय गोरखपुर यूनिवर्सिटी में बुध के भइल विद्या परिषद के मीटिंग में कइयन गो महत्वपूर्ण फैसला लिहल गइल। एमे UGC के गाइडलाइन के मोताबिक नया एजुकेशन पॉलिसी में PHD डिग्री देवे के मापदंड आ प्रक्रिया के आवश्यक संसोधन के मंजूरी दिहल गइल। अब एकरा के 1 फरवरी के होखे वाला कार्य परिषद के मीटिंग में फाइनल अप्रूवल खातिर रखल जाई।
एह दौरान कुलपति प्रोफेसर पूनम टंडन कहली कि UGC 2022 के रेगुलेशन के अपनावल गइल बा। यूनिवर्सिटी आ कॉलेजन में पढ़ावे वाला टीचर्स के PHD खातिर डिपार्टमेंट के ओर से अनुकूल टाइम-टेबल बनाके शोध करे के सहूलियत दिहल जाई।
संगही अब यूनिवर्सिटी ड्यूल डिग्री, जॉइंट डिग्री प्रोग्राम खातिर देस के आउर यूनिवर्सिटीज आ बिदेसी यूनिवर्सिटीज के बीच करार खातिर बनावल गइल पॉलिसी के अप्रूवल दिहल गइल। अगिला सत्र से यूनिवर्सिटी में 4 ईयर ग्रेजुएशन प्रोग्राम के विद्या परिषद के स्वीकृति मिलल जवन UGC के क्रेडिट फ्रेमवर्क के मोताबिक होई।
यूनिवर्सिटी में स्थापित होई सेंटर फॉर आनलाइन एंड डिस्टेंस एजुकेशन
यूनिवर्सिटी में सेंटर फॉर आनलाइन एंड डिस्टेंस एजुकेशन स्थापित होई। एकरा खातिर विद्या परिषद आपन सहमति दे देले बा। कुलपति कहली कि ई यूनिवर्सिटी के एगो महत्वपूर्ण केंद्र होई। हमनी UGC के कैटगरी 1 यूनिवर्सिटी के श्रेणी में आवे खातिर प्रयासरत बानी सs। एकरा से हमनी के कइयन ममिलन में आत्मनिर्भरता मिली। मीटिंग में भारतीय ज्ञान परंपरा अध्ययन केंद्र आ भारतीय भाषा संवर्धन केन्द्र स्थापित करे पs सहमति बनल।
अयोध्या अध्ययन केंद्र पs विद्या परिषद के मुहर
प्राचीन इतिहास आ मध्यकालीन इतिहास विभाग के तहत अयोध्या अध्ययन केंद्र स्थापित कइल जाए पs विद्या परिषद के मुहर लाग गइल बा। विद्या परिषद के सदस्यन के इंजीनियरिंग एंड टेक्नोलॉजी फैकल्टी के तहत इंस्टिट्यूट ऑफ फार्मेसी में पांच गो डिपार्टमेंट के संचालित करे के फैसलन के बारे में बतावल गइल, जवना पs अगिला मीटिंग में निर्णय लेवे के सहमति बनल। एकरा संगही रैंकिंग सेल आ एग्रीकल्चर फैकल्टी के संस्तुतियन के सहमति दे दिहल गइल बा।
