गर्मी में दिल्ली खातिर एक जोड़ी स्पेशल ट्रेन : 30 अप्रिल से 28 जून तक लगाई 18 फेरा, छपरा के यात्रियन के मिली लाभ
रेलवे प्रशासन गरमी में यात्रियन के भीड़ के देखत ट्रेन संख्या 05305/05306 छपरा-आनन्द विहार टर्मिनस-छपरा ग्रीष्म कालीन विशेष गाड़ी चलावे के निर्णय लेले बा। ई ट्रेन छपरा से 30 अप्रिल से लेके 28 जून तक हर मंगर आ सुक के चली। जबकि आनन्द विहार टर्मिनस से एक मई से लेके 29 जून तक हर बुध आ सनीचर के 18 फेरा खातिर चलावल जाई।
जनसंपर्क पदाधिकारी अशोक कुमार पत्र जारी करत बतवलें कि ट्रेन संख्या 05305 छपरा-आनन्द विहार टर्मिनस ग्रीष्म कालीन विशेष गाड़ी 30 अप्रिल के छपरा से 23:55 बजे खुली। एकरा बाद दूसरका दिन सीवान, थावे, तमकुही, पडरौना, कप्तानगंज, गोरखपुर, खलीलाबाद, बस्ती, बभनान होत आनन्द विहार टर्मिनस 20:00 बजे पहुंची।
वापसी यात्रा में ट्रेन संख्या 05306 आनन्द विहार टर्मिनस-छपरा ग्रीष्म कालीन विशेष गाड़ी एक मई के आनन्द विहार टर्मिनस से 22:30 बजे खुली। एकरा बाद गाजियाबाद, इटावा, कानपुर सेन्ट्रल, ऐशबाग, बाराबंकी, गोंडा, मनकापुर, बभनान होत छपरा 17:30 बजे पहुंची।
बता दीं कि एह गाड़ी में एलएसएलआरडी के दु, साधारण द्वितीय श्रेणी के चार गो, शयनयान श्रेणी के चार, वातानुकूलित तृतीय के 10 आ वातानुकूलित द्वितीय श्रेणी के दुगो कोच सहित कुल 22 कोच लगावल जाई।
