Ranji Trophy: गिल-पंत के बाद अब ई स्टार भारतीय खिलाड़ी लिहें रणजी ट्रॉफी में हिस्सा, टीम के देलें जानकारी

स्पोर्ट्स डेस्क: ऑस्ट्रेलिया दौरा पs निराशाजनक प्रदर्शन के बाद कइयन गो भारतीय खिलाड़ी रणजी ट्रॉफी में खेले के इच्छा जाहिर कs चुकल बा लो। भारतीय कप्तान रोहित शर्मा, विकेटकीपर बल्लेबाज ऋषभ पंत आ शुभमन गिल के बाद एह सूची में यशस्वी जायसवाल के नाम जुड़ गइल बा। मीडिया रिपोर्ट्स के अनुसार, यशस्वी मुंबई क्रिकेट संघ (एमसीए) आ कोच ओमकार साल्वी के बता देले बाड़ें कि ऊ 23 जनवरी से जम्मू-कश्मीर के खिलाफ टीम के अगिला रणजी ट्रॉफी मुकाबला खातिर उपलब्ध रहिहें।

यशस्वी ऑस्ट्रेलिया दौरा पs एगो शतक आ एगो अर्धशतक लगवले रहस। एमसीए के एगो अधिकारी बतवलें, यशस्वी मुंबई के कोच साल्वी के सूचित कइले बाड़ें कि ऊ टीम के अगिला रणजी ट्रॉफी मुकाबला उपलब्ध बाड़ें। चयन समिति आवे वाला कुछ दिनन में मुंबई टीम के चयन करी।

रोहित टीम से जुड़ल रहलें

यशस्वी से पहिले रोहित शर्मा मंगर के मुंबई टीम के संगे अभ्यास सत्र में जुड़ल रहस। जदि रोहित खुद के चयन खातिर उपलब्ध रखत बाड़ें तs मुंबई टीम में स्टार खिलाड़ी नजर अइहें। टीम में पहिलही से अजिंक्य रहाणे उपलब्ध बाड़ें। यशस्वी इंग्लैंड के खिलाफ होखे वाला पांच मैचन के टी20 सीरीज के हिस्सा नइखन। बतावल जा रहल बा कि यशस्वी बुध के वानखेड़े स्टेडियम में मुंबई टीम के अभ्यास सत्र से जुड़िहें।

रोहित कप्तान अजिंक्य रहाणे के संगे बल्लेबाजी अभ्यास करत नजर आइल रहस। रोहित आखिरी बेर रणजी ट्रॉफी में 2015 में उत्तर प्रदेश के खिलाफ खेलत नजर आइल रहस। रोहित हालांकि एकर पुष्टि नइखे कइलन कि ऊ जम्मू-कश्मीर के खिलाफ चयन खातिर उपलब्ध होइहें कि ना। पिछलका साल फरवरी में भारतीय क्रिकेट कंट्रोल बोर्ड (बीसीसीआई) शीर्ष क्रिकेटरन से समय मिलला पs घरेलू क्रिकेट में खेले खातिर कहले रहे।

शुभमन-पंत लिहें हिस्सा

रोहित आ यशस्वी के अलावा शुभमन गिल आउर पंत अपना-अपना राज्य के टीमन के प्रतिनिधित्व करी लो। गिल पंजाब आ पंत दिल्ली टीम के रणजी ट्रॉफी के अगिला दौर में खेले के बारे में बता देले बा लो। हाले में दिल्ली आ जिला क्रिकेट संघ (डीडीसीए) बतवले रहे कि पंत 23 जनवरी से होखे वाला मुकाबला खातिर खुद के उपलब्ध बतवले बाड़ें। दिल्ली टीम संभावित खिलाड़ियन के जवन सूची जारी कइले रहे, ओमे पंत के अलावा विराट कोहली के नाम सामिल रहस। हालांकि, कोहली रणजी ट्रॉफी में खेले के लेके कवनो सूचना नइखन देलें।

सरफराज खान चोटिल

रणजी ट्रॉफी के अगिला दौर से पहिले मुंबई के झटका लागल बा काहेकि टीम के बल्लेबाज सरफराज खान चोटिल हो गइल रहस। सरफराज एमसीए के सूचित कइले बाड़ें कि ऊ चोटिल बाड़ें। जवना कारण ऊ चयन खातिर उपलब्ध ना रह सकिहें। हालांकि, उनकर चोट केतना गंभीर बा एकर पता फिलहाल नइखे चल सकल।