अतवारी छौंक: बात कुछ पुरनका दौर के! जवना साधना कट खातीर लईकी पागल रहली, ओकरा पीछे बा मजेदार कहानी...

खबर भोजपुरी रउरा लोग के सोझा एगो नया सेगमेंट लेके आइल बा , जवना में रउरा के पढ़े के मिली फिलिम इंडस्ट्री से जुड़ल रोचक कहानी आ खिसा जवन बितsल जमाना के रही।

आजू पढ़ी जवना साधना कट खातीर लईकी पागल रहली, ओकरा पीछे के कहानी का बा?

साधना शिवदासानी अपना समय के बेहतरीन अभिनेत्री रहल बाड़ी. साधना ना खाली अभिनय खातिर मशहूर भइली बलुक हेयर स्टाइल खातिर अउरी मशहूर हो गइली. ‘मेरा साया’, ‘वो कौन थी’ आ ‘'वक्त’ जइसन सुपरहिट फिलिमन में काम करे वाली साधना के लोग के आजुओ याद बा. साधना के जनम पाकिस्तान के कराची में भइल रहे। आज हम रउआ सभे के साधना के एगो अनसुना कहानी बतावे जा रहल बानी। रउरा सभे के जरूर निक लागी-

साधना अपना कैरियर के शुरुआत राज कपूर के फिल्म ‘श्री 420’ से बाल कलाकार के रूप में कइली. एकरा बाद सोलह साल के उमिर में उनुका के सिंधी फिल्म ‘अबाना’ में लीड के रूप में देखल गइल. साधना एह फिलिम में काम करे खातिर महज एक रुपिया लिहली. हालांकि एह फिल्म से उनुका कवनो खास पहचान ना मिलल. साधना के लोकप्रियता फिल्म ‘लव इन शिमला’ से मिलल. फेर एगो समय आइल जब ई अभिनेत्री अपना समय के सबले बेसी वेतन पावे वाली नायिका बन गइली. लव इन शिमला में साधना के अभिनय तs सराहल गइल साथे उनुकर हेयर स्टाइल भी लोग के बहुते नीक लागल. एह हेयर स्टाइल के पीछे भी एगो मजेदार कहानी बा।

एह तरे साधना कट मशहूर भइल

बतावल जाला कि जब साधना लव इन शिमला में काम करत रहली तs फोटो में उनुकर माथा साफ लउकत रहे। साधना के चेहरा फिल्म निर्देशक आरके नैय्यर के तनी अजीब लागल. आरके नैय्यर के साधना के माथा बहुत बड़ लागल। उs हॉलीवुड एक्ट्रेस ऑड्रे हेपबर्न निहन साधना के हेयर स्टाइल करावा देले अवुरी आगे के बाल के माथे पs पसार के माथा के छिपा देले। बाद में साधना के इs हेयर स्टाइल उनुकर पहचान बन गईल। ई हेयर स्टाइल एह अभिनेत्री के बहुते सूट कइलस जवना के बाद में ‘साधना कट’ के नाम से जानल गइल. साधना के बियाह अपना पहिला फिल्म ‘लव इन शिमला’ के निर्देशक आर के नैय्यर से भइल. शूटिंग के दौरान ही दुनो लोग के एक दूसरा से प्यार हो गईल। आर के नैय्यर के निधन 1995 में हो गइल रहे। दुनु में से केहू के कवनो संतान ना रहे एहसे अभिनेत्री अकेले रह गइली. पति के निधन के बाद साधना रोग से पीड़ित होखे लगली। उs सार्वजनिक आयोजन में शामिल होखे में भी कमी कईले। आखिरकार 25 दिसंबर 2015 के ई दिग्गज अभिनेत्री एह दुनिया से हमेशा खातिर अलविदा कह दिहली.