100 टेस्ट खेले वाला भारत के 14वां खिलाड़ी बनिहें अश्विन: 92 साल में चार गेंदबाज खेल सकल लो 100+ मुकाबला, रिकॉर्ड कुंबले के नाम

भारतीय ऑफ स्पिनर रविचंद्रन अश्विन धर्मशाला में अपना टेस्ट करियर के 100वां मैच खेलिहें। ऊ 100 टेस्ट खेले वाला भारत के 14वां खिलाड़ी बनिहें। ऊ ई मुकाम हासिल करे वाला दुनिया के 77वां खिलाड़ी होइहें।

अश्विन भारत के 92 साल के टेस्ट इतिहास में खाली पांचवां गेंदबाज होइहें, जे 100 भा ओसे ज्यादा टेस्ट खेलिहें। उनका से पहिले अनिल कुंबले, कपिल देव, इशांत शर्मा आ हरभजन सिंह ई उपलब्धि हासिल कइले बा लो।

अश्विन के अलावा इंग्लैंड के जॉनी बेयरस्टो के ई 100वां टेस्ट मैच होई। ऊ 100 टेस्ट खेले वाला 17वां इंग्लिश प्लेयर बनिहें।

भारत आ इंग्लैंड के बीच पांच मैचन के टेस्ट सीरीज के आखिरी मुकाबला सात मार्च से धर्मशाला के हिमाचल प्रदेश क्रिकेट एसोसिएशन स्टेडियम में खेलल जाई। भारत सीरीज में 3-1 से आगे बा।

अश्विन 100 टेस्ट खेले वाला चउथा एक्टिव भारतीय होइहें 

अश्विन से पहिले 100 टेस्ट खेले के उपलब्धि 13 भारतीय खिलाड़ी हासिल कs चुकल बा। एह लिस्ट में पूर्व स्टार बैटर सचिन तेंदुलकर टॉप पs बाड़ें। दूसरका नंबर पs टीम इंडिया के मवजूदा हेड कोच राहुल द्रविड़ बाड़ें। अश्विन टेस्ट मैचन के सेंचुरी पूरा करे वाला विराट कोहली, चेतेश्वर पुजारा आ इशांत शर्मा के बाद चउथा एक्टिव भारतीय खिलाड़ी होई लो।

इशांत शर्मा अपना आखिरी इंटरनेशनल मैच 2021 में खेलले रहस। ओकरा बाद ऊ इंटरनेशनल क्रिकेट से दूर बाड़ें, बाकिर अब तक ऊ ऑफिशियल रिटायरमेंट नइखन लिहल लो।

इंग्लैंड के खिलाड़ी सबसे जादे 100 टेस्ट खेलल लो

टेस्ट क्रिकेट के इतिहास में सबसे जादे 100 मैच खेले वाला खिलाड़ी इंग्लैंड के बा लो। अब तक इंग्लैंड के 16 खिलाड़ी ई माइलस्टोन हासिल कइले बा लो। ऑस्ट्रेलिया एह लिस्ट में दूसरका नंबर पs बा। ओहिजा, भारत के नाम एह लिस्ट में तीसरका नंबर पs बा।

अश्विन टेस्ट में 500 विकेट लेवे वाला दूसरका भारतीय

अश्विन 99 टेस्ट में 507 विकेट लेले बाड़ें। ऊ 500 विकेट लेवे वाला खाली दूसरका भारतीय गेंदबाज हवे। उनका पहिले अनिल कुंबले 105 मैचन में ई उपलब्धि हासिल कइले रहस। ऊ सबसे कम टेस्ट में 500 विकेट हासिल करे वाला गेंदबाजन के लिस्ट में दूसरका नंबर पs बा। खाली श्रीलंका के मुथैया मुरलीधरन उनका से कम मैचन (87) में 500 विकेट पूरा कइले रहे लो।

अश्विन भारत के ओर से एगो टीम के खिलाफ सबसे जादे विकेट लेलें 

अश्विन एगो टीम के खिलाफ सबसे जादे विकेट लेवे वाला भारतीय बॉलर हवे। अश्विन ऑस्ट्रेलिया के खिलाफ 22 मैच में खेलल गइल आ 114 विकेट लेलें। एह लिस्ट में दूसरका नंबर पs अनिल कुंबले बा। ऊ ऑस्ट्रेलिया के खिलाफ 111 विकेट झटकले बा लो।

अश्विन 35 बार टेस्ट में 5 विकेट हॉल लेलें

अश्विन टेस्ट क्रिकेट में 35 बार 5 विकेट हॉल (एके पारी में पांच विकेट) लेले बाड़ें। ऊ टेस्ट में सबसे जादे बेर एक पारी में पांच विकेट लेवे वाला दूसरका भारतीय हवे। उनका से पहिले अनिल कुंबले अइसन कs चुकल बाड़ें। कुंबले 35 बेर एक पारी में पांच भा ओकरा से जादे विकेट झटकले बाड़ें।