Railway News: अगिला बरिस भटनी से प्रयागराज तक डबल लाइन पs दउड़ी ट्रेन, आगरा तक चली पूजा स्पेशल

पूर्वोत्तर रेलवे के ट्रेन अगिला साल से भटनी से प्रयागराज तक डबल लाइन (दोहरीकरण) पs दउड़ी। भटनी से औड़िहार तक 117 किमी रेल लाइन पs लगभग 60 किमी लाइन के दोहरीकरण पूरा हो गइल बा। बाकी 57 किमी के दोहरीकरण के काम तेज बा। तुर्तीपार स्टेशन के लगे सरयू नदी पs पुल के निर्माण चल रहल बा।

बनारस से प्रयागराज तक डबल लाइन पहिलही बिछ चुकल बा। झूसी से प्रयागराज के बीच गंगा पुल के निर्माण अंतिम चरण में बा। दिसंबर 2024 तक इहो पुल खुल जाई। महाकुंभ में प्रयागराज तक ट्रेनन के संचालन आउर सुगम हो जाई।

मुख्य जनसंपर्क अधिकारी पंकज कुमार सिंह के मोताबिक भटनी-औड़िहार खंड (117 किमी) दोहरीकरण परियोजना के अंतर्गत किड़िहरापुर-इन्दारा (12.98 किमी),सादात-औड़िहार (18.21 किमी), भटनी-पिवकोल (5.25 किमी), बेलथरा रोड-किड़िहरापुर (13.85 किमी) सहित अब तक कुल 50.29 किमी काम पूरा हो गइल बा।

जखनिया-सादात- पिपरीडीह- दुल्लहपुर (39.18 किमी) आ पिवकोल-सलेमपुर-लार रोड-बेलथरा रोड (27.53 किमी) के दोहरीकरण के कार्य विद्युतीकरण सहित प्रगति पs बा, जवना के पूरा हो गइला पs भटनी-औड़िहार (117 किमी) पूरा रेल खंड दोहरीकृत हो जाई। दोहरीकरण परियोजना के कुल लागत 2529.46 करोड़ रुपिया बा। साल 2024- 25 के बजट में एह परियोजना के पूरा करे खातिर 413.33 करोड़ के आवंटन कइल गइल बा।

दोहरीकरण के काम पूरा हो गइला पs ट्रैक क्षमता बढ़ जाई। ट्रेनन के समय पालन दुरुस्त होई। यात्रियन के मांग के अनुसार आउर अतिरिक्त गाड़ी चलावल जा सकी। एह क्षेत्र के आर्थिक विकास होई।

गोरखपुर के रास्ते आगरा तक चली पूजा स्पेशल

त्योहारन में आगरा आ कटिहार तक के यात्रा करे वाला लोगन खातिर राहत भरल बा। यात्रियन के भीड़ के देखत रेलवे प्रशासन गोरखपुर के रास्ते 04195/04196 आगरा कैंट-फारबिसगंज-आगरा कैंट साप्ताहिक स्पेशल ट्रेन के घोषणा कइले बा।

मुख्य जनसंपर्क अधिकारी पंकज कुमार सिंह के अनुसार ई ट्रेन आगरा कैंट से चार अक्टूबर से 22 नवम्बर तक हर सुक के आ फारबिसगंज से पांच अक्टूबर से 23 नवम्बर तक हर सुक के कुल आठ फेरा में चलावल जाई। एह ट्रेन में शयनयान श्रेणी के चार, वातानुकूलित तृतीय श्रेणी के दु, वातानुकूलित द्वितीय श्रेणी के दु, वातानुकूलित तृतीय श्रेणी इकोनामी के दुगो कोच लगावल जाई।