पाकिस्तान में भारी बारिश से 87 लोगन के मउत, कईगो घायल, मौसम विभाग जारी कइलस चेतावनी

पाकिस्तान में पिछला हफ्ता बरखा के चलते भइल अलग अलग घटना में नाहियो तs 87 लोग के मउत हो गइल बा आ 82 लोग घवाहिल हो गइल बा. एनडीएमए बियफे के दिने कहलस कि बरखा के चलते देश भर में 2,715 घरन के आंशिक भा पूरा तरह से नुकसान भइल बा आ कहलस कि अधिकतर मउत संरचनात्मक ढहले, बिजली आ बाढ़ से भइल बा.

मौसम विभाग चेतावनी जारी कइले बा

पाकिस्तान के प्रधानमंत्री शहबाज शरीफ हाल के भारी बरखा के चलते जान अवुरी संपत्ति के नुकसान पs गहरा दुख जतवले अवुरी संबंधित विभाग से प्रभावित इलाकन में राहत के काम में तेजी ले आवे अवुरी बरखा के चलते बंद सड़क के खोल के सलाह देले। एकरा से पहिले बियफे के दिने अपना मौसम पूर्वानुमान रिपोर्ट में एनडीएमए भविष्यवाणी कइले रहुवे कि जारी बरखा 22 अप्रैल ले जारी रही आ कहलस कि बरखा के उमेद के चलते देश के बहुते इलाकन में अचानक बाढ़ आ सकेला.

पंजाब आ खैबर पख्तूनख्वा में अधिकतम नुकसान

भारी बरखा से सबले बेसी नुकसान आ जानमाल के नुकसान देश के उत्तर-पश्चिमी खैबर पख्तूनख्वा प्रांत में भइल बा जहाँ मूसलाधार बरखा के चलते 36 लोग के जान गइल आ 53 लोग घवाहिल हो गइल, ओकरा बाद पूर्वी पंजाब प्रांत में 25 लोग आ आठ लोग घवाहिल होखे के खबर बा. एनडीएमए के कहना बा कि दक्षिण पश्चिमी बलूचिस्तान प्रांत में 15 लोग के मउत हो गइल आ 10 लोग घवाहिल हो गइल बा जबकि पाकिस्तान के कब्जा वाला कश्मीर में भइल भारी बरखा के चलते 11 लोग के मउत हो गइल आ 11 लोग घवाहिल हो गइल बा।