ICC Awards 2024: सर्वश्रेष्ठ क्रिकेटरन से लेके सर्वश्रेष्ठ टीम तक, इहां देखीं आईसीसी अवॉर्ड्स के पूरा लिस्ट

स्पोर्ट्स डेस्क : आईसीसी साल 2024 खातिर अलग-अलग श्रेणी में अवॉर्ड्स के घोषणा कइलस। 24 जनवरी से एकर सुरुआत भइल रहे, जब पुरुष आ महिला श्रेणी में सर्वश्रेष्ठ टी20 आ वनडे टीमन के घोषणा कइल गइल रहे। एकरा बाद व्यक्तिगत श्रेणी में आईसीसी विजेता नामन के एलान कइलें। तीनों प्रारूपन के मिलाके अभी ले 12 व्यक्तिगत अवॉर्ड्स आ पांच सर्वश्रेष्ठ टीमन के एलान आईसीसी कइले बा। आईं जानल जावs…

रेचेल हेहो फ्लिंट ट्रॉफी (साल 2024 के सर्वश्रेष्ठ महिला क्रिकेटर): अमेलिया कर

24 साल के अमेलिया एह अवॉर्ड खातिर एल वोल्वार्ड्ट, चमारी अट्टापट्टू आ एनाबेल सदरलैंड के पीछे छोड़ली। अमेलिया ना खाली रेचेल हेहो फ्लिंट ट्रॉफी जीते वाली पहिला न्यूजीलैंड क्रिकेटर हई बल्कि कवनो श्रेणी में आईसीसी महिला क्रिकेटर ऑफ द ईयर के अवॉर्ड जीते वाली पहिला कीवी खिलाड़ी हई। अमेलिया से पहिले ई खाली तीन खिलाड़ियन के दिहल गइल रहे। एमे ऑस्ट्रेलिया के एलिसे पेरी, भारत के स्मृति मंधाना आ इंग्लैंड के नेट सीवर ब्रंट सामिल बा लो। ई तीनों दु-दु बेर ई अवॉर्ड जीतले बा लो।

साल 2024 के सर्वश्रेष्ठ पुरुष टेस्ट क्रिकेटर: जसप्रीत बुमराह

भारत के जसप्रीत बुमराह साल 2024 खातिर आईसीसी के सर्वश्रेष्ठ टेस्ट क्रिकेटर के अवॉर्ड जीतलें। एह अवॉर्ड के सुरुआत 2004 में भइल रहे। ऑस्ट्रेलिया-भारत के सबसे जादे छव-छव खिलाड़ी आईसीसी टेस्ट क्रिकेटर ऑफ द ईयर अवॉर्ड जीतले बा लो। भारत के राहुल द्रविड़ एकर पहिला विजेता रहस। ओहिजा, स्टीव स्मिथ ई सम्मान दु बेर जीते वाला एकमात्र क्रिकेटर हवे। भारत-ऑस्ट्रेलिया के अलावा इंग्लैंड के तीन खिलाड़ी, दक्षिण अफ्रीका के दु खिलाड़ी ई अवॉर्ड जीतले बा लो। पाकिस्तान आ श्रीलंका के एक-एक क्रिकेटर एह लिस्ट में बा लो। बुमराह से पहिले द्रविड़, गंभीर, सहवाग, अश्विन आ कोहली ई अवॉर्ड जीतले बा लो।

साल 2024 के सर्वश्रेष्ठ महिला वनडे क्रिकेटर: स्मृति मंधाना

भारतीय महिला टीम के उपकप्तान स्मृति मंधाना आईसीसी के साल के सर्वश्रेष्ठ महिला वनडे क्रिकेटर चुनल गइली। मंधाना पिछला साल सानदार प्रदर्शन कइले रहली आ 13 मैचन में 747 रन बनवले रहली। ई एक कैलेंडर बरिस में उनका ओर से बनावल गइल सर्वाधिक रन रहे। मंधाना एह दौरान 57.86 के औसत आ 95.15 के स्ट्राइक रेट से बल्लेबाजी कइले रही। मंधाना एह दौरान चार वनडे शतक लगवले रहस, जवन महिला लोगन में एगो रिकॉर्ड बा। मंधाना 2024 में 95 गो चौका आ छव गो छक्का जड़ले रहली आ ऊ आईसीसी महिला चैंपियनशिप में सर्वाधिक रन बनावे वाली बल्लेबाज रहली। ई दूसरका बेर हs जब मंधाना साल के सर्वश्रेष्ठ महिला वनडे खिलाड़ी चुनल गइल बा। ऊ अइसन करे वाली दुनिया के दूसरका महिला बल्लेबाज हई, उनका से पहिले न्यूजीलैंड के सूजी बेट्स एह क्लब में सामिल एकमात्र महिला क्रिकेटर रहली।

साल 2024 के सर्वश्रेष्ठ पुरुष वनडे क्रिकेटर: अजमातुल्लाह ओमरजई

अफगानिस्तान के ऑलराउंडर अजमातुल्लाह ओमरजई के आईसीसी के साल के सर्वश्रेष्ठ पुरुष वनडे खिलाड़ी चुनल गइल बाड़ी। ओमरजई आपन तेज गेंदबाजी आ बल्लेबाजी से बहुते प्रभावित कइले रहली। 24 साल के ओमरजई ना खाली वनडे, बलुक टी20 अंतरराष्ट्रीय आ फ्रेंचाइजी क्रिकेट में दबदबा बनवले रहस। हालांकि, वनडे में उनकर प्रदर्शन बहुते सानदार रहल रहस। अफगानिस्तान 2024 में पांच में से चार वनडे सीरीज जीतले रहे। ओमरजई अफगानिस्तान के पहिला खिलाड़ी हवे, जिनका के साल के सर्वश्रेष्ठ वनडे खिलाड़ी चुनल गइल बा। राशिद खान के 2020 में दशक के सर्वश्रेष्ठ टी20 खिलाड़ी चुनल गइल रहे।

साल 2024 के सर्वश्रेष्ठ उभरत महिला क्रिकेटर: एनेरी डर्कसेन

दक्षिण अफ्रीका के होनहार एनेरी डर्कसेन 2024 खातिर आईसीसी के उभरत महिला क्रिकेटर चुनल गइल। डर्कसन पहिला बेर जनवरी 2023 में भारत आ वेस्टइंडीज के खिलाफ टी20 त्रिकोणीय सीरीज के दौरान अंतरराष्ट्रीय डेब्यू कइले रहली। एकरा बाद फेर ऊ कबो पीछे मुड़के ना देखली। ऊ 23 साल 2024 में वनडे आ टेस्ट में डेब्यू कइली आ खुद के एगो बेहतरीन ऑलराउंडर के रूप में स्थापित कइली। डर्कसेन साल 2024 में 17 टी20 अंतरराष्ट्रीय में 161 रन बनवलें आ पांच विकेट झटकली। ओहिजा, दु टेस्ट में ऊ 60 रन बनवली। एकरा अलावे चार वनडे में ऊ 70 रन बनवली आ छव विकेट झटकली।

साल 2024 के सर्वश्रेष्ठ उभरत पुरुष क्रिकेटर: कामिंदु मेंडिस

श्रीलंका के स्टार ऑलराउंडर कामिंदु मेंडिस साल 2024 के उभरत खिलाड़ी चुनल गइल बा। तीनो प्रारूप में मेंडिस प्रभावित कइलें रहस। ऊ पिछला साल टेस्ट प्रारूप में टीम खातिर सर्वश्रेष्ठ प्रदर्शन करे वाला खिलाड़ी रहस। मेंडिस पिछला साल नव टेस्ट मैचन में 74.92 के औसत से 1049 रन बनवलें जेमें पांच शतक आ तीन अर्धशतक सामिल बा। ऊ ओह छव बल्लेबाजन में सामिल बाड़ें, जे 2024 में टेस्ट में 1000 भा एकरा से जादे रन बनवलें।

आईसीसी महिला एसोसिएट क्रिकेटर ऑफ द ईयर: ईशा ओजा
आईसीसी पुरुष एसोसिएट क्रिकेटर ऑफ द ईयर: गेरार्ड इरैस्मस
आईसीसी अंपायर ऑफ द ईयर: रिचर्ड इलिंगवर्थ

साल 2024 के सर्वश्रेष्ठ टी20 क्रिकेटर: अर्शदीप सिंह

भारतीय टीम के तेज गेंदबाज अर्शदीप सिंह आईसीसी के 2024 के सर्वश्रेष्ठ पुरुष टी20 खिलाड़ी बनलें। अर्शदीप पिछला साल अमेरिका आ वेस्टइंडीज के मेजबानी में खेलल गइल टी20 विश्व कप में सानदार प्रदर्शन कइले रहस आ भारत के खिताब दिलावे में अहम भूमिका निभवले रहस। अर्शदीप हाले में टी20 अंतरराष्ट्रीय में भारत के सबसे सफल गेंदबाज बनल रहस।

साल 2024 के सर्वश्रेष्ठ पुरुष टी20 टीम

आईसीसी साल 2024 के सर्वश्रेष्ठ पुरुष टीम में चार भारतीयन के सामिल कइले बा, बाकिर एमे ना तs विराट कोहली के आ ना मवजूदा टी20 कप्तान सूर्यकुमार यादव के नाम बा। ऊ दुनो पिछलका साल टी20 विश्व कप जीते वाली टीम के हिस्सा रहे लो। ओहिजा, टीम के कमान विश्व विजेता कप्तान रोहित शर्मा के सउपल गइल बा। रोहित आ विराट टी20 विश्व कप 2024 के बाद टी20 अंतरराष्ट्रीय से संन्यास ले लेले रहस।

आईसीसी के साल 2024 के सर्वश्रेष्ठ T20I पुरुष टीम: रोहित शर्मा (कप्तान) (भारत), ट्रेविस हेड (ऑस्ट्रेलिया), फिल सॉल्ट (इंग्लैंड), बाबर आजम (पाकिस्तान), निकोलस पूरन (विकेटकीपर), सिकंदर रजा (जिम्बाब्वे), हार्दिक पांड्या (भारत), राशिद खान (अफगानिस्तान), वानिंदु हसरंगा (श्रीलंका), जसप्रीत बुमराह (भारत) आ अर्शदीप सिंह (भारत)।

साल 2024 के सर्वश्रेष्ठ महिला टी20 टीम

सर्वश्रेष्ठ महिला टी20 टीम में तीन भारतीयन के सामिल कइल गइल बा। एमे स्मृति मंधाना, ऋचा घोष के अलावा दीप्ति शर्मा के नाम बा। टीम में भारत के सबसे जादे तीन खिलाड़ी बा लो, जबकि दक्षिण अफ्रीका के दु खिलाड़ी एह टीम में जगह बनवले रहली। टीम के कमान द. अफ्रीका के एल वोल्वार्ड्ट के सउपल गइल बा।

साल 2024 के आईसीसी के सर्वश्रेष्ठ महिला टी20 टीम: एल वोल्वार्ड्ट (कप्तान) (दक्षिण अफ्रीका), मारिजाने कैप (दक्षिण अफ्रीका), स्मृति मंधाना (भारत), ऋचा घोष (विकेटकीपर) (भारत), दीप्ति शर्मा (भारत); चमारी अट्टापट्टू (श्रीलंका); हेली मैथ्यूज (वेस्टइंडीज); नेट सीवर-ब्रंट (इंग्लैंड); मेली कर (ऑस्ट्रेलिया), ओर्ला प्रेंडरगैस्ट (आयरलैंड) आ सादिया इकबाल (पाकिस्तान)।

साल 2024 के सर्वश्रेष्ठ पुरुष टेस्ट टीम

आईसीसी साल 2024 खातिर पुरुषन के सर्वश्रेष्ठ टेस्ट टीम के एलान कइले बा। एह टीम में भारत के तीन खिलाड़ियन के जगह मिलल बा, बाकिर एमे ना तs रोहित शर्मा आ ना विराट कोहली आ रविचंद्रन अश्विन। टीम के कमान ऑस्ट्रेलियाई कप्तान पैट कमिंस के सउपल गइल बा। सर्वश्रेष्ठ टेस्ट टीम में इंग्लैंड के सबसे जादे चार खिलाड़ी बा लो। ओहिजा, भारत के तीन आ न्यूजीलैंड के दु खिलाड़ियन के जगह मिलल बा। ऑस्ट्रेलिया के खाली एगो खिलाड़ी एह टीम में बा, जबकि विश्व टेस्ट चैंपियनशिप के फाइनल में पहुंचे वाली दक्षिण अफ्रीका के टीम के कवनो खिलाड़ी एह टीम में नइखे लो।

साल 2024 के ICC टेस्ट टीम: पैट कमिंस (कप्तान) (ऑस्ट्रेलिया), यशस्वी जयसवाल (भारत), बेन डकेट (इंग्लैंड), केन विलियम्सन (न्यूजीलैंड), जो रूट (इंग्लैंड), हैरी ब्रूक (इंग्लैंड), कामिंदु मेंडिस (श्रीलंका), जेमी स्मिथ ( विकेटकीपर) (इंग्लैंड), रवींद्र जडेजा (भारत), मैट हेनरी (न्यूजीलैंड), जसप्रीत बुमराह (भारत)।

साल 2024 के सर्वश्रेष्ठ महिला वनडे टीम

आईसीसी के साल 2024 के सर्वश्रेष्ठ महिला वनडे टीम में दुगो भारतीयन के जगह दिहल गइल बा। एमे स्टार बल्लेबाज स्मृति मंधाना आ ऑलराउंडर दीप्ति शर्मा सामिल बा लो। महिलन के सर्वश्रेष्ठ वनडे टीम में भारत के अलावा इंग्लैंड के तीन खिलाड़ी, ऑस्ट्रेलिया आ दक्षिण अफ्रीका के दु-दु खिलाड़ी सामिल बा लो। ओहिजा, श्रीलंका आ वेस्टइंडीज के एक-एक खिलाड़ी बा लो।

2024 खातिर आईसीसी महिला वनडे टीम ऑफ द ईयर: स्मृति मंधाना (भारत), एल वोल्वार्ड्ट (कप्तान) (दक्षिण अफ्रीका), चमारी अट्टापट्टू (श्रीलंका), हेली मैथ्यूज (वेस्टइंडीज), मारिजाने कैप (दक्षिण अफ्रीका), एश्ले गार्डनर (ऑस्ट्रेलिया), एनाबेल सदरलैंड (ऑस्ट्रेलिया), एमी जोन्स (विकेटकीपर) (इंग्लैंड), दीप्ति शर्मा (भारत), सोफी एक्लेस्टोन (इंग्लैंड) आ केट क्रॉस (इंग्लैंड)।

साल 2024 के सर्वश्रेष्ठ पुरुष वनडे टीम

साल 2024 में जादे वनडे ना खेले के भारत के एगो आउर नुकसान भइल। आईसीसी के साल 2024 के सर्वश्रेष्ठ वनडे टीम में कवनो भारतीय के जगह ना मिलल। आईसीसी टीम जारी कइलस आ एकर कप्तानी श्रीलंका के चरिथ असलंका के सउपले बा। एह टीम में विश्व चैंपियन ऑस्ट्रेलिया के कवनो खिलाड़ी नइखे। माने 2023 विश्व कप फाइनल खेले वाली दुनो टीमन से कवनो खिलाड़ी नइखे।

2024 खातिर आईसीसी पुरुष वनडे टीम ऑफ द ईयर: चरिथ असलांका (कप्तान) (श्रीलंका), सैम अयूब (पाकिस्तान), रहमानुल्लाह गुरबाज (अफगानिस्तान), पथुम निसांका (श्रीलंका), कुसल मेंडिस (विकेटकीपर) (श्रीलंका), शेरफेन रदरफोर्ड (वेस्टइंडीज), अजमतुल्लाह ओमरजई (अफगानिस्तान) ), वानिंदु हसरंगा (श्रीलंका), शाहीन शाह अफरीदी (पाकिस्तान), हारिस रऊफ (पाकिस्तान) आ आएएम गजनफर (अफगानिस्तान)।

Read Also: Paytm: पेटीएम पेमेंट सर्विस के सीईओ नकुल जैन देलें इस्तीफा, कंपनी शेयर बाजार के बतवलस प्लान