इंडिया मोबाइल कांग्रेस इवेंट आजु से, दिल्ली के प्रगति मैदान में पीएम मोदी करिहें उद्घाटन
आज इंडिया मोबाइल कांग्रेस 2023 (India Mobile Congress 2023) शुरू होखे जा रहल बा। देश के ई सबले बड़का टेक इवेंट दिल्ली के प्रगति मैदान में आयोजित कइल जा रहल बा। प्रधानमंत्री नरेंद्र मोदी भारत मोबाइल कांग्रेस 2023 के उद्घाटन करीहें। प्रगति मैदान में ई कार्यक्रम तीन दिन ले चलत रही। इंडिया मोबाइल कांग्रेस के आयोजन भारतीय दूरसंचार विभाग आ सेल्युलर ऑपरेटर्स एसोसिएशन के ओर से कईल जाता।
बता दीं कि इंडिया मोबाइल कांग्रेस के ई सातवाँ संस्करण हs। एहमें भाग लेबे खातिर दुनिया भर के कई देशन के लोग दिल्ली चहुँप रहल बा। एगो रिपोर्ट के मुताबिक एकरा में करीब 32 देश के 1300 से जादे प्रतिनिधि भाग लीहे। एकरा संगे करीब 400 वक्ता भी एकरा में भाग ले रहल बाड़े।
IMC के सातवाँ संस्करण बहुते खास बा
टेक्नोलॉजी के दुनिया में इंडिया मोबाइल कांग्रेस एगो बड़ आयोजन हs। आईएमसी के ई सातवाँ संस्करण कई मायने में बहुते खास होखे वाला बा। एकरा में एगो विशेष कार्यक्रम भी शुरू कईल जाई जवन कि एस्पायर प्रोग्राम होई। एह एस्पायर कार्यक्रम में दूरसंचार आ डिजिटल क्षेत्र में रुचि राखे वाला युवा उद्यमी लोग के आपन बिजनेस शुरू करे में मदद कइल जाई। आईएमसी 2023 के बारे में आईटी मंत्री अश्विनी वैष्णव कहले रहले कि अब समय आ गईल बा कि भारत के टेक्नोलॉजी महाशक्ति के रूप में स्थापित कईल जाए।
आईएमसी 2023 तकनीक के कई क्षेत्र खातीर खास होखे वाला बा। एह में भारत में आवे वाली भविष्य के तकनीक के बारे में भी जानकारी दिहल जाई। आईएमसी 2023 में आर्टिफिशियल इंटेलीजेंस के लेके भी बड़ घोषणा हो सकता। एह आयोजन में जवना विषय पs चर्चा हो सकेला ऊ बा ब्रॉडकॉस्टिंग, 5जी के विस्तार, 6जी खातिर देश के तइयारी, ड्रोन तकनीक पs भी चर्चा कइल जा सकेला।