अमेरिका से आगे निकलल भारत, पीएम मोदी 5G के लेके कहले बड़ बात, मेड इन इंडिया 6G के तैयारी

तकनीक के मामला में भारत दुनिया के कई गो विकसित देशन से मुकाबला कs रहल बा। 5जी लॉन्च करे से लेके 6जी के तैयारी ले भारत दुनिया के कवनो देश से पीछे नईखे। हालही में पीएम मोदी अमेरिका के दौरा पs गइल बाड़न. उहाँ उs भारत के टेक्नोलॉजी सेक्टर अवुरी 5जी बाजार के उपलब्धि के बारे में बहुत कुछ कहले बाड़े। भारत में 1 अक्टूबर 2022 के 5जी सेवा शुरू हो गईल बा। एकरा बाद से देश में 5जी नेटवर्क के बिछावल गईल बा। देश भर के हर टेलीकॉम क्षेत्र में 5जी सेवा शुरू हो गईल बा।

भारत के दूरसंचार बाजार के बात करत पीएम मोदी कहले कि इहाँ के 5जी बाजार अमेरिका से बड़ बा। एकरा अलावे पीएम कहले कि अब मेड इन इंडिया 6जी पs काम हो रहल बा। फिलहाल भारत में 4.5 लाख 5जी बीटीएस बा, जवन कि अपने आप में गर्व के बात बा। एतने ना, भारत सस्ता 5जी स्मार्टफोन के भी बड़ बाजार बा। 5जी नेटवर्क के विस्तार अवुरी सस्ता 5जी स्मार्टफोन के उपलब्धता के चलते उपयोगकर्ता के संख्या भी तेजी से बढ़ रहल बा।

फिलहाल भारत में दुगो टेलीकॉम ऑपरेटर्स – एयरटेल अवुरी जियो 5जी सेवा दे रहल बाड़े। एकरा संगे वोडाफोन आइडिया (Vi) भी जल्दिए आपन 5जी सेवा शुरू करे वाला बा। एकरा अलावे सरकारी टेलीकॉम कंपनी बीएसएनएल भी 5जी नेटवर्क के परीक्षण शुरू कs देले बिया। सरकारी टेलीकॉम कंपनी पूरा तरीका से मेड इन इंडिया 5जी सेवा दिही। वर्तमान सरकार बीएसएनएल के पुनरुत्थान खातीर 6000 करोड़ रुपिया के फंड जारी कईले बिया। आवे वाला समय में अउरी फंड जारी कईल जाई।

अमेरिका के दौरा के दौरान पीएम मोदी गूगल अवुरी अल्फाबेट के सीईओ सुंदर पिचाई से भी मुलाकात कईले बाड़े। गूगल के सीईओ भी पीएम मोदी के विजन के तारीफ कईले। भारत में 5जी के विस्तार के चलते भविष्य में एआई तकनीक के अपार संभावना बा। गूगल अवुरी एप्पल जईसन बड़ तकनीक कंपनी भारत में अपना स्मार्टफोन के दुनिया भर के बाजार में असेंबल करतिया। सरकार के पीएलआई योजना के चलते इs संभव भईल बा।