JDU Party : आज दिल्ली में जदयू के राष्ट्रीय कार्यकारिणी के बइठक, सीएम नीतीश कुमार ले सकत बाड़े बड़ फैसला
लोकसभा चुनाव के बाद पहिला बेर सीएम नीतीश कुमार के पार्टी के राष्ट्रीय कार्यकारिणी के बइठक दिल्ली के संवैधानिक क्लब में हो रहल बा। एकर अध्यक्षता सीएम नीतीश कुमार करीहें। उऽ शुक के दुपहरिया में दिल्ली पहुंच चुकल बाड़े। पार्टी के सब केंद्रीय मंत्री, बिहार सरकार के मंत्री, सांसद, विधायक आउरी प्रदेश अध्यक्ष के साथे 100 से जादे कार्यकारिणी सदस्यो दिल्ली पहुंचल बाड़े। एह बइठक के सब तइयारी पूरा हो गइल बा।
सीएम नीतीश कुमार आवे वाला विधानसभा चुनाव के लेके अपना पार्टी के नेता से बात करीहें। एह दौरान उ बहुत बड़ फैसला ले सकऽ ताड़े। कुछ बदलाव के घोषणा बइठक के बाद कइल जा सकऽता। विधानसभा चुनाव के देखत पार्टी के राष्ट्रीय अध्यक्ष नीतीश कुमार एक बेर फेर हैरान कऽ सकऽ ताड़े। जदी जदयू के सूत्र पs विश्वास करल जाव तऽ पार्टी के राष्ट्रीय अध्यक्ष सीएम नीतीश कुमार आज सबेरे 10.30 बजे राष्ट्रीय अधिकारी के संगे बइठक करीहें। एकरा बाद आज सबेरे एगारह बजे से राष्ट्रीय कार्यकारिणी के बइठक शुरू हो जाई।
तीन दिन के दौरा पs दिल्ली गइल सीएम नीतीश कुमार विधानसभा चुनाव में सीट बंटवारा के लेके भाजपा के शीर्ष नेतृत्व से भेंट कऽ सकऽ ताड़े। जदि सूत्र पs विश्वास कइल जाव तऽ जदयू विधानसभा चुनाव में भाजपा के बराबर सीट पs आपन महत्वाकांक्षा जतावल चाहऽ तिया।
लोकसभा चुनाव के बाद ई पहिलका बइठक होई
लोकसभा चुनाव के बाद ई पहिला बइठक होई। एकरा से पहिले जदयू के राष्ट्रीय कार्यकारिणी के बइठक दिसंबर 2023 में भइल रहे। एह बइठक में ललन सिंह राष्ट्रीय अध्यक्ष के पद छोड़ दिहले। एकरा बाद पार्टी के नेता नीतीश कुमार के राष्ट्रीय अध्यक्ष पद पs बइठा देले।
अबकी 12 गो लोकसभा सीट जदयू के खाता में बा
सीएम नीतीश कुमार आ उनुकर पार्टी एक बेर फेर से सुर्खियन में बा। लोकसभा के 12 सीट जीत के जदयू राष्ट्रीय लोकतांत्रिक गठबंधन में तीसरा सबसे बड़ पार्टी बन गइल। जदयू से दू गो सांसद अबकी मोदी मंत्रिमंडल के सदस्य बाड़े। ललन सिंह के केंद्रीय मंत्री आ रामनाथ ठाकुर के केंद्रीय राज्यमंत्री बनावल गइल बा। अटल बिहारी वाजपेयी सरकार के बाद पहिला बेर सीएम नीतीश कुमार के पार्टी के दू गो नेता के केंद्रीय मंत्रिमंडल में शामिल कइल गइल बा। एकरा से पहिले 2021 में आरसीपी सिंह अकेले मंत्रिमंडल में शामिल भइल रहलें। अब ललन सिंह आ रामनाथ ठाकुर के मंत्री बनावल गइल बा।