अतवारी छौंक: बात कुछ पुरनका दौर के! काहें तनुजा के 16 साल के उमिर में पढ़ाई छोड़के करे के पड़ल रहे फिलिम
खबर भोजपुरी रउरा लोग के सोझा एगो नया सेगमेंट लेके आइल बा , जवना में रउरा के पढ़े के मिली फिलिम इंडस्ट्री से जुड़ल रोचक कहानी आ खिसा जवन बितsल जमाना के रही।
आजू पढ़ी तनुजा 16 साल के उमिर में पढ़ाई छोड़के काहें कइली फिलिम.
बॉलीवुड अभिनेत्री तनुजा कई दशक से फिलिम इंडस्ट्री में सक्रिय बाड़ी। उनुका के आपन काबिलियत खातिर जानल जाला आ उनुकर चुलबुलापन फिलिमन में लउकत रहे. रात अकेली है, बुझ गए दिए’ जइसन गीतन में तनुजा के मोहक अवतार में देखले होखब आ देव आनंद के गीत ‘ये दिल ना होता बेचारा’ में तनुजा के क्रोध देखावत भी देखले होखब. आज हमनी के तनुजा के निजी जीवन के बारे में कुछ खास बात बतावे जा रहल बानी जा। कइसे तनुजा फिलिम इंडस्ट्री में आपन छाप छोड़ले बाड़ी.
परिवार के आर्थिक हालत के चलते तनुजा के सोलह साल के उमर में डेब्यू करे के पड़ल।ओह घरी ऊ स्विट्जरलैंड के सेंट सेंट जोसफ बोर्डिंग में पढ़त रहली। तनुजा पहिले पंचघनी के सेंट जोसेफ बोर्डिंग स्कूल में पढ़ाई कइली आ ओकरा बाद उनुका के माई स्विट्जरलैंड भेज दिहली काहे कि तनुजा के भाषा के बहुते शौक रहे. तनुजा के दोस्ती टाइगर पटौदी (मंसूर अली खान पटौदी) के बहिन साबिहा पटौदी से हो गईल।
हालांकि तनुजा के घर के आर्थिक हालत ठीक ना रहे एहसे उनुका घरे लवटे के पड़ल। उनकर माई उनका से कहली कि ऊ या तs दुख मना सकेली भा हिंदी सिनेमा में काम कs सकेली आ तनुजा हिंदी फिलिम चुनली. 16 साल के उमिर में उनकर पहिला फिलिम ‘छबीली’ 1960 में रिलीज भइल. एकरा बाद 1962 में 'मेमदीदी'। तनुजा कई गो बंगाली फिलिम भी कइले बाड़ी। तनुजा के मुताबिक बंगाली फिलिम उनुका के अवुरी संतुष्टि देत रहे।
एही तरे मुलाकात शोमू मुखर्जी से भइल
तनुजा के मुलाकात शोमू मुखर्जी से फिलिम ‘एक बार मुस्कुरा दो’ के सेट पs भइल. ई कवनो फिलिमी कहानी ना रहे. दुनु जाना के एक दूसरा के संगत पसंद रहे अउरी कुछ समय एक संगे बितावे लगले। डेटिंग शुरू भईला के कुछ समय बाद तनुजा अवुरी शोमू मुखर्जी के बियाह भईल। दुनों के बियाह 1973 में भईल अवुरी दु बेटी काजोल अवुरी तनीशा के जनम भईल।
बाकिर तनुजा आ शोमू मुखर्जी के बीच सब ठीक ना रहे। तनिशा मुखर्जी के जनम के कुछ दिन बाद दुनो लोग अलग हो गईले।
तनुजा के तुलना हमेशा नूतन आ शोभना समर्थ से कइल जात रहे बाकिर तनुजा के आपन पहचान भी बहुते खास रहे. उनकर फिलिम बहुते यादगार रहल बाड़ी सँ.