सपा से गठबंधन खतम होखला पs पल्लवी पटेल के बड़ बयान - एनडीए से ऑफर मिलल तs विचार करेम

समाजवादी पार्टी से अपना दल कमेरावादी के गठबंधन टूटला के बाद पल्लवी पटेल बड़ बयान देले बाड़ी। ऊ कहली कि जदि एनडीए से ऑफर मिलल तs हम एह पs विचार करेम। ऊ कहलें कि इंडिया गठबंधन हमनी के संगे उहे कs रहल बा जवन नीतीश कुमार के संगे कइल। हमनी के तीन सीट गठबंधन के सहजोगियन से चरचा के बाद घोषित कइले रहनी सs। अखिलेश गठबंधन खतम होखे के बात कहले बाड़ें। उनकर स्वागत बा। ऊ कहलें कि कांग्रेस तय करे कि अपना दल कमेरावादी इंडिया गठबंधन में बिया की ना। एनडीए से ऑफर आइल तs सोचल जाई। हमनी के राजनीति करे के बा।

बता दीं कि अपना दल के दूसरका घटक अपना दल सोनेलाल एनडीए के सहजोगी दल हs आ एकर राष्ट्रीय अध्यक्ष अनुप्रिया पटेल हई। ऊ केंद्र में मंत्री बाड़ी। अपना दल कमेरावादी के अध्यक्ष उनकर माई कृष्णा पटेल अक्सर खुलके अपना बड़ी बेटी अनुप्रिया के सार्वजनिक तौर पs निंदा करत रहेली।

सपा अध्यक्ष अखिलेश यादव बियफे के अपना दल कमेरावादी से 2024 के लोकसभा चुनाव में गठबंधन न होखला के एलान कs देलें। एकरा एक दिन पहिले कृष्णा पटेल के अगुवाई वाला ई दल प्रदेश के तीन लोकसभा सीटन पs चुनाव लड़े के एलान कs देले रहे। अखिलेश यादव कहलें कि अपना दल कमेरावादी से विधानसभा चुनाव 2022 खातिर गठबंधन कइल गइल रहे, 2024 खातिर ना।

सपा से लोकसभा के सीटन पs बात न बनला पs कृष्णा पटेल बुध के मिर्जापुर सहित तीन सीटन पs चुनाव लड़े के घोषणा कइले रहली। एकरा कुछ देर बादे सपा मिर्जापुर सीट पs आपन प्रत्याशी उतार देलस। कृष्णा पटेल के बेटी पल्लवी पटेल सपा के सिंबल पs कौशांबी के सिराथू विधानसभा सीट से चुनाव लड़ले रहली आ डिप्टी सीएम केशव प्रसाद मौर्य के हरवले रहली।