Supreme Court: अब 'न्याय की देवी' के आंख से हटल पट्टी... हाथ में तलवार के जगह संविधान... आखिर काहें... इहां जानीं
सुप्रीम कोर्ट में बुध के दिने ‘न्याय के देवी’ के नया मूर्ति लगावल गइल. ई मूर्ति पुरनका मूर्ति जइसन नइखे। एकरा में बहुत बदलाव भईल बा। पुरनका मूर्ति में न्याय देवी के आँख पs पट्टी बान्हल रहे आ एक हाथ में तलवार आ दूसरा हाथ में तराजू रहे।
कानून के आँख पs पट्टी बान्हला के चलते आन्हर कहल गइल बाकिर नया मूर्ति में आँख पs पट्टी हटा दिहल गइल बा. संविधान अब ओह हाथ के सौंप दिहल गइल बा जवना हाथ में तलवार रहे. जवन हाथ तराजू के पकड़ले रहे ओकर आकार पहिले जइसन बा नया मूर्ति में। सुप्रीम कोर्ट में न्यायाधीशन के पुस्तकालय में ‘न्याय की देवी’ के नया मूर्ति लगावल गइल बा. रउरा सभे के बता दी कि मूर्ति में बदलाव करे के का मतलब बा?
आँख पs पट्टी बान्ह के हाथ में तलवार के का मतलब होला?
मुख्य न्यायाधीश डीवाई चंद्रचूड के पहल पs 'न्याय के देवी' के नाया मूर्ति लगावल गईल बा। पुरनका मूर्ति में कानून के देवी के आँख पs पट्टी आ हाथ में तलवार के एगो खास मतलब रहे। आँख पर पट्टी बान्हल न्याय व्यवस्था में समानता के प्रतिनिधित्व करेला। मतलब कि अमीर होखे भा गरीब, ताकतवर होखे भा कमजोर, कानून के नजर में सभे बराबर बा।
मतलब कि अदालत अपना सोझा आवे वाला सभ शिकायतकर्ता अवुरी मुकदमेबाज के धन, सत्ता, जाति-धर्म, लिंग, रंग चाहे कवनो अवुरी सामाजिक स्थिति के आधार पs फैसला ना करेले। न्याय के देवी के हाथ में तलवार के मतलब रहे कि कानून में भी दोषी के सजा देवे के ताकत रहे।
नया मूर्ति में का खास बा?
1. जज लोग के पुस्तकालय में स्थापित न्याय देवी के नया मूर्ति सफेद रंग के बा।
2. नया मूर्ति के कपड़ा भी बदल दिहल गइल बा। भारतीय परिधान साड़ी पहिनले एगो नया मूर्ति बा।
3. मूर्ति के माथा पs मुकुट बा। जइसे पौराणिक कथा सभ में देवी लोग के माथा पs मुकुट वाला बतावल जाला।
4. नया मूर्ति के माथा पs बिंदी बा। मूर्ति के गहना से ना सजावल गईल बा।
5. नया मूर्ति के एक हाथ में पहिले निहन तराजू बा, बाकिर दूसरा हाथ में तलवार के जगह संविधान बा।
6. मूर्ति के एक हाथ में तराजू से पता चलता कि कोर्ट कवनो फैसला पs पहुंचे से पहिले दुनो पक्ष के बात ध्यान से सुनेला। तराजू संतुलन के प्रतीक हs।
मूर्ति काहे बदलल गइल?
मुख्य न्यायाधीश डीवाई चंद्रचूड के पहल पs इs नया मूर्ति लगावल गईल बा। सीजेआई के मानल बा कि कानून आन्हर ना हs बाकिर कानून सभका साथे बराबर व्यवहार करेला. एही कारण से आँख पs पट्टी हटा दिहल गईल बा। मुख्य न्यायाधीश के मानल बा कि मूर्ति के एक हाथ में संविधान होखे के चाहीं ना कि तलवार जेहसे कि देश के संदेश भेजल जा सके कि ऊ संविधान के मुताबिक न्याय करेला.
तलवार हिंसा के प्रतीक हs, बाकिर अदालत संवैधानिक कानून के मुताबिक न्याय देवेले। एकरा अलावे एकरा के औपनिवेशिक विरासत के पीछे छोड़े के कोशिश के रूप में भी देखल जा रहल बा। जइसे भारतीय दंड संहिता जइसन औपनिवेशिक कानून के जगह भारतीय न्यायिक संहिता ले लिहल गइल बा. लेडी ऑफ जस्टिस के मूर्ति में बदलाव कईल भी एs कड़ी के तहत उठावल कदम मानल जा सकता।
केने से भारत में आईल न्याय के देवी के मूर्ति
न्याय के देवी के मूर्ति यूनान से इंग्लैंड पहुंचल रहे। उहाँ से एगो अंग्रेज अफसर इs मूर्ति भारत ले आईल रहले। ई अंग्रेज अफसर कोर्ट के अफसर रहले। न्याय के देवी के मूर्ति के 18वीं सदी के दौरान ब्रिटिश युग में सार्वजनिक उपयोग में ले आवल गईल। बाद में जब देश आजाद भइल तs हमनी के न्याय के देवी के भी स्वीकार कइनी जा। न्याय के देवी असल में एगो प्राचीन यूनानी देवी हई, जेकरा के न्याय के प्रतीक कहल जाला। उनकर नाम जस्टिया हs। जस्टिस शब्द उनुका नाम से बनल बा.
तिलक मार्ग पs जस्टिस क्लॉक
एगो अउरी बदलाव भइल बा. सुप्रीम कोर्ट के सामने तिलक मार्ग पs एगो बड़ वीडियो वॉल लगावल गईल बा। एहमें सुप्रीम कोर्ट के जस्टिस क्लॉक हर समय चलत रहेला. एकरा संगे सुप्रीम कोर्ट में केस के बारे में रियल टाइम जानकारी मिल सकता। रउरा सभे के मालूम हो सकेला कि वेबसाइट पs जस्टिस क्लॉक देखल जा सकेला बाकिर सीधे आम जनता के जानकारी देबे खातिर आ सिस्टम में पारदर्शिता ले आवे खातिर जस्टिस क्लॉक के वीडियो वॉल लगावल गइल बा.