प्लास्टिक के खिलाफ पुलिस आ नगर निगम के छापेमारी, दुकानदारन से 8 हजार के वसूली
छपरा: शहर में दर्जनन के संख्या में पुलिसकर्मी आ नगर निगम के पदाधिकारी शहर के अलग-अलग क्षेत्रन में प्लास्टिक के खिलाफ छापेमारी करे पहुंचलें। एह दौरान शहर के योगनिया कोठी, नगरपालिका चौक, थाना चौक, साहिबगंज आ सब्जी मंडी में छापेमारी करत 50 किलोग्राम प्लास्टिक आ प्लास्टिक से बनल सामानन के जब्त कइल गइल।
जबकि बेचे वाला दुकानदारन पs 8000 रुपिया के जुर्माना लगावल गइल। प्लास्टिक के खिलाफ छापेमारी के खबर मिलतही शहर के दुकानदारन में हड़कंप मच गइल। सब दुकानदार अपना-अपना दुकान में रखल प्लास्टिक के थैली आ सामग्री हटावे लागल। छपरा नगर निगम क्षेत्र सहित पर्यावरण के लेके राज्य सरकार के निरदेस पs नगर निगम प्रशासन के ओर से प्लास्टिक मुक्त अभियान के तहत छापेमारी कइल गइल।
50 किलोग्राम प्लास्टिक जब्त
औचक छापेमारी टीम के नेतृत्व कs रहल स्वच्छता पदाधिकारी संजीव कुमार मिश्रा बतवलें कि बिहार सरकार के आदेस पs समस्त बिहार सहित छपरा नगर निगम के प्लास्टिक मुक्त अभियान के तहत छापेमारी करत प्लास्टिक के उपयोग आ बेचे वाला दुकानदारन के खिलाफ कार्यवाही कइल गइल।
जेमे शहर के अलग-अलग जगहन पs छापेमारी करत 50 किलोग्राम प्लास्टिक आ ओकर बनल समान के जब्त कइल गइल। शहरी क्षेत्र में प्लास्टिक के इस्तेमाल करेवाला आ बिक्री करेवाला के खिलाफ आठ हजार के जुर्माना लगावल गइल।
स्वच्छता पs अधिकारी बतवलें कि आवे वाला दिनन में शहर के अलग-अलग क्षेत्र में औचक छापेमारी कइल जाई। जेमे पकड़ल गइल दुकानदारन पs जुर्माना करत प्लास्टिक जब्त कइल जाई। पर्यावरण के स्वच्छ रखला के लेके छपरा नगर निगम के मुहिम लगातार चलत रही।
