बिहार: प्रशांत किशोर से जुड़ल एह वक्त के बड़ खबर, पटना सिविल कोर्ट से मिलल जमानत
प्रशांत किशोर के पटना सिविल कोर्ट से जमानत मिलल बा। उल्लेखनीय बा कि पटना के गांधी मैदान में अनिश्चित काल खातिर अनशन पs बईठल जन सुराज के मुखिया प्रशांत किशोर के पटना पुलिस गिरफ्तार कs लेलस अवुरी गांधी मैदान में उs जगह जहां जन सुराज के मुखिया प्रशांत किशोर अनिश्चित काल खातीर अनशन पs बईठल रहले, उs जगह खाली कs दिहलस . प्रशांत किशोर के गिरफ्तारी के बाद उनुका के कोर्ट में पेश कईल गईल।
जन सुराज एगो प्रेस विज्ञप्ति में कहले रहले कि पुलिस जबरन प्रशांत किशोर के उठा के अस्पताल ले गईल। संगही आरोप लगावल गईल कि पुलिस प्रशांत पs थप्पड़ मार देलस। एगो समर्थक के दावा बा कि प्रशांत किशोर के चश्मा भी फेंक दिहल गईल।
इs बयान जिला प्रशासन के ओर से आईल बा
जिला प्रशासन एगो बयान जारी कs कहले रहे कि जन सुराज पार्टी के प्रशांत किशोर अवुरी कुछ अवुरी लोग अपना पांच सूत्री मांग खातीर प्रतिबंधित इलाका में गांधी मैदान के गांधी मूर्ति के सोझा अवैध विरोध प्रदर्शन करतारे। प्रशासन के ओर से नोटिस दिहल गईल कि उहाँ से हट के विरोध प्रदर्शन खातीर तय भईल जगह गर्दनीबाग जाए के चाही।
प्रतिबंधित क्षेत्र में अवैध विरोध के चलते गांधी मैदान थाना में प्राथमिकी दर्ज करावल गईल। बार-बार निहोरा अवुरी भरपूर समय के बावजूद इs जगह खाली ना भईल। एहसे आजु सबेरे कुछ समर्थकन के साथे उनुका के गिरफ्तार कs लिहल गइल बा. हालांकि उs लोग पूरा तरीका से स्वस्थ बाड़े। एs प्रक्रिया के तहत एs लोग के कोर्ट के सोझा पेश करे खातीर कार्रवाई कईल जाता।