BGT: ऑस्ट्रेलिया दौरा खातिर एह दिन घोषित हो सकत बिया भारतीय टीम, चेतेश्वर पुजारा के नाम दउड़ में सामिल?
घरेलू टूर्नामेंट में लगातार अच्छा प्रदर्शन कs रहल भारतीय अनुभवी बल्लेबाज चेतेश्वर पुजारा ऑस्ट्रेलिया के पिछिला दु दौरन पs कंगारू गेंदबाजन के पसीना ले आ देले रहे। पुजारा कुछ समय से भारतीय टीम से बाहर चल रहल बाड़ें, बाकिर भारतीय सीनियर टीम के चयनकर्ता एह अनुभवी खिलाड़ी के बॉर्डर-गावस्कर ट्रॉफी खातिर टीम में चुन सकत बा लो। बतावल जा रहल बा कि भारतीय क्रिकेट कंट्रोल बोर्ड (बीसीसीआई) पांच मैचन के एह टेस्ट सीरीज खातिर 28 अक्टूबर के टीम घोषित कs सकत बिया।
भारत आ ऑस्ट्रेलिया के बीच 22 नवंबर से टेस्ट सीरीज खेलल जाये के बा। भारतीय टीम ऑस्ट्रेलिया के खिलाफ टेस्ट सीरीज में जीत के हैट्रिक लगावे के इरादा से उतरी। अजीत अगरकर के अगुआई वाली चयन समिति जदि उनका अनुभव पs जाव तs पुजारा के चयन संभव बा। ई 36 वर्षीय बल्लेबाज ने हाले में रणजी ट्रॉफी में छत्तीसगढ़ के खिलाफ 383 गेना पs 234 रन के पारी खेलले रहस आ बतवले रहस कि उनका में रन बनावे के भूख अभियो बाकी बा।
ऑस्ट्रेलिया के खिलाफ बेहतर बा पुजारा के रिकॉर्ड
पुजारा के ऑस्ट्रेलिया के खिलाफ रिकॉर्ड अच्छा रहल बा आ ऊ 2018-19 सीरीज में सबसे जादे रन बनावे वाला खिलाड़ी थरहस। पुजारा ओह दौरा में 1258 गेना के सामना कइले रहस आ कुल 521 रन बनवले रहस। एकरा तीन साल बाद पुजारा एक बेर फेर भारत खातिर महत्वपूर्ण साबित भइल रहे आ ऊ ऑस्ट्रेलिया के खिलाफ सीरीज में 928 गेना के सामना कइले रहस आ 271 रन बनवले रहस। पुजारा पैट कमिंस, जोश हेजलवुड आ मिचेल स्टार्क जइसन ऑस्ट्रेलिया के दिग्गज गेंदबाजन के सामने देवाल के तरे खड़ा रहस। पुजारा अंतिम बेर भारत खातिर पिछला साल विश्व टेस्ट चैंपियनशिप (डब्ल्यूटीसी) के फाइनल मुकाबला खेलले रहस। एकरा बाद से ऊ भारतीय टीम के हिस्सा नइखन रहल।
रेड्डी के तेज गेंदबाजी ऑलराउंडर के तौर पs कइल जा रहल बा तइयार
बांग्लादेश के खिलाफ सीरीज में अच्छा प्रदर्शन के बावजूद नितीश रेड्डी दक्षिण अफ्रीका के खिलाफ टी20 सीरीज खातिर भारतीय टीम के हिस्सा ना होइहें काहेकि उनका ऑस्ट्रेलिया दौरा खातिर भारतीय ए टीम में चुनल गइल बा। दूसरका तरफ, शार्दुल ठाकुर चोट से वापसी के बाद कवनो खास प्रदर्शन नइखन कइले आ ऊ प्रभावित नइखन कs सकल। शार्दुल पिछिला ऑस्ट्रेलिया दौरा पs सानदार प्रदर्शन कइले रहस आ गाबा टेस्ट में भारत के मिलल ऐतिहासिक जीत में उनकर जोगदान रहे।
शमी के मिली मवका?
जसप्रीत बुमराह, मोहम्मद सिराज आ आकाश दीप टेस्ट टीम में आपन जगह पक्का कइले बा लो, बाकिर आवेश खान आ यश दयाल जइसन खिलाड़ी दउड़ में सामिल बा लो। अनुभवी तेज गेंदबाज मोहम्मद शमी हाले में खुद के फिट बतवले रहस, बाकिर ऊ सायद ऑस्ट्रेलिया सीरीज तक पूरा तरे फिट ना हो पावस जवना कारण शमी सीरीज के सुरुआती हिस्सा से बाहर रह सकत बाड़ें।