IND vs BAN: टी20 में सबसे तेज 2500 रन पूरा करे वाला दूसरका भारतीय बनलें सूर्यकुमार, खेललें सानदार अर्धशतकीय पारी

भारतीय टी20 कप्तान सूर्यकुमार यादव बांग्लादेश के खिलाफ हैदराबाद में खेलल गइल टी20 मैच के दौरान एगो खास उपलब्धि अपना नावे कs लेलें। सूर्यकुमार टी20 अंतरराष्ट्रीय में 2500 रन पूरा कs लेले बाड़ें। ऊ अइसन दूसरका भारतीय हवे जे सबसे तेजी से ई कारनामा कइले बाड़ें। बायां हाथ के ई बल्लेबाज 71वीं पारी में ई उपलब्धि अपना नावे कइलें। सूर्यकुमार एह मैच में सानदार प्रदर्शन कइलें आ 35 गेना पs आठ चौका आ पांच छक्का के मदद से 75 रन बनवलें।

भारत खातिर टी20 में सबसे तेज 2500 रन पूरा करे के रिकॉर्ड विराट कोहली के नावे दर्ज बा। कोहली दिसंबर 2019 में वेस्टइंडीज के खिलाफ हैदराबाद में खेलल गइल मैच के दौरान ई उपलब्धि हासिल कइले रहस। कोहली 2500 रन पूरा करे खातिर 68 पारी लेले रहस। ओवरऑल सबसे तेज 2500 रन पूरा करे के रिकॉर्ड अभियो पाकिस्तान के पूर्व कप्तान बाबर आजम के नावे बा। बाबर 62 पारियन में ई उपलब्धि अपना नावे दर्ज कइले रहस। भारत के अपना कप्तानी में टी20 विश्व कप के खिताब दिलावे में रोहित शर्मा 2500 रन पूरा करे खातिर 92 पारी लेले रहस।

टी20 में सबसे तेज 2500 रन पूरा करे वाला बल्लेबाज

• बाबर आजम 62 पारी
• मोहम्मद रिजवान 65 पारी
• विराट कोहली 68 पारी
• सूर्यकुमार यादव 71 पारी
• आरोन फिंच 78 पारी
• मार्टिन गुप्टिल 83 पारी

सूर्यकुमार-संजू के साझेदारी से जीतल भारत

बांग्लादेश के खिलाफ तीसरका टी20 मैच में संजू सैमसन आ सूर्यकुमार ताबड़तोड़ बल्लेबाजी कइलें आ रिकॉर्ड के झड़ी लगा देलें। सैमसन मात्र 40 गेना पs आपन टी20 अंतरराष्ट्रीय करिअर के पहिला शतक जड़लें। पिछलका दु मैचन में बड़ पारी खेले में विफल रहे वाला सैमसन एह पारी के बदौलत टीम प्रबंधन आ कप्तान के भरोसा पs खरा उतरे में सफल रहलें। सैमसन 47 गेना पs 11 चौका आ आठ छक्कन के मदद से 111 रन बनाके आउट भइलें। ई उनका टी20 करिअर के सर्वश्रेष्ठ स्कोर बा। सैमसन कप्तान सूर्यकुमार यादव के संगे मिलके दूसरका विकेट खातिर 173 रन के साझेदारी कइलें। एह दुनों के सानदार पारियन के दम पs भारत बांग्लादेश के खिलाफ ई मुकाबला 133 रन से जीतल आ तीन मैचन के सीरीज 3-0 से क्लीन स्वीप कइलस।