सोनपुर मेला के समग्र विकास खातिर केंद्र सरकार देलस 25 करोड़ रूपिया
विश्व प्रसिद्ध सोनपुर मेला के आयोजन के संबंध में सोनपुर नगर पंचायत सभागार में सारण के सांसद राजीव प्रताप रूडी के मौजूदगी में स्थानीय जनप्रतिनिधि, मेला समिति के सदस्य, जिला आ अनुमंडल स्तर के अधिकारी के मौजूदगी में बइठक भइल। बतावल गइल कि एह साल सोनपुर मेला 13 नवम्बर से शुरू होखी आ 14 दिसंबर 2024 ले चली। एह बइठक में मौजूद सगरी प्रतिनिधियन से महत्वपूर्ण प्रतिक्रिया आ सुझाव मिलल। मेला से पहिले सड़क अउरी स्ट्रीट लाइट के मरम्मत करावे, सोनपुर में स्थायी सीसीटीवी, महिला खातिर शौचालय, स्मारिका प्रकाशन आदि के सुझाव दिहल गइल।
मेला के विकास स्वदेश दर्शन योजना 2.0 के तहत कइल जाई
बतावल गईल कि सोनपुर मेला क्षेत्र के समग्र विकास खाती स्वदेश दर्शन योजना 2.0 के तहत केंद्र सरकार के ओर से 25 करोड़ रुपया के मंजूरी मिल गइल बा। पूरा मेला क्षेत्र के समग्र विकास खातिर पर्यटन विभाग के ओर से कार्य योजना बनावल जाता। एह कार्ययोजना के ब्लूप्रिंट का प्रेजेंटेशन पॉवरपॉइंट के माध्यम से चयनित एजेंसी द्वारा कइल गइल। अंतिम रूप से मंजूर कार्य योजना के मुताबिक मेला क्षेत्र के स्थायी विकास खातिर कार्रवाई कइल जाई।
मेला के उचित दस्तावेजीकरण होई
सांसद कहले कि पिछला साल के मेला समेत हर साल के मेला के सही दस्तावेजीकरण होखे के चाही। एमें स्थानीय लोग से भी जरूरी सहयोग करे के कहल गइल उप विकास आयुक्त आ अनुमंडल पदाधिकारी सोनपुर मेला के आयोजन के तइयारी के बारे में जानकारी दिहलें।
सोनपुर मेला में बुनियादी ढांचा अउरी सुरक्षा के इंतजाम खातिर सीसीटीवी कैमरा अउरी ड्रोन आदि खातिर निविदा के माध्यम से कार्रवाई कइल जाता। एकरा संगे-संगे मेला परिसर में साफ-सफाई, खाना के इंतजाम अउरी टेंट/पंडाल खातिर अलग-अलग निविदा के माध्यम से भी कार्रवाई कइल जाता।
शौचालय आ चेंजिंग रूम के व्यवस्था होई
मेला में आवे वाला मेहमान आ जानवरन खातिर पीये के पानी के उपलब्धता सुनिश्चित कइल जाई। चौबीसों घंटा एम्बुलेंस के सुविधा के संगे-संगे पशु चिकित्सा सेवा उपलब्ध होई। सोनपुर मेला स्थल पऽ आपदा प्रबंधन टीम आ भगदड़ नियंत्रण टीम मौजूद रही। कार्तिक पूर्णिमा स्नान के समय शौचालय अउरी चेंजिंग रूम के इंतजाम होई।
प्रचार पऽ खास ध्यान दिहल जाई
मेला के प्रचार पूरा उत्साह से कइल जाई। स्थानीय क्षेत्र में माइकिंग होई, मेला क्षेत्र में प्रवेश के सभ मार्ग पऽ होर्डिंग लगावल जाई। सोशल मीडिया के इस्तेमाल से मेला में रोजाना होखे वाला कार्यक्रम के बारे में जनता तक पहुंचावल जाई।
मेला क्षेत्र में सुरक्षा के इंतजाम पऽ विशेष ध्यान दिहल जाई पुलिस अलग-अलग जगह पऽ हेल्प डेस्क लगाई। छेड़छाड़ के मामिला पऽ खास ध्यान दिहल जाई। सिविल ड्रेस में पुलिस अधिकारी बदमाश पऽ नजर रखिहें। लोग के सुविधा खातिर खोया - पाया काउंटर लगावल जाई।
महत्वपूर्ण आयोजन के मौका पs भीड़ नियंत्रण ले लेके दबाव बिंदु पs खास ध्यान दिहल जाई, जहां समस्या पैदा हो सकऽता। उचित आपातकालीन प्रवेश आ निकास बिंदु के साफ पहचान आ उचित संकेत लगावल जाई।