देसभर में ठप भइल X, Jio, Google सहित ऑनलाइन प्लेटफॉर्म्स के सेवा भइल ठप
Jio Network Down: का रउओ वाट्सऐप, इंस्टाग्राम आ टेलीग्राम चलावे में दिक्कत हो रहल बा। तs रउआ अकेले नइखीं। देस में जियो,एयरटेल, गूगल आ कइयन गो आउर ऑनलाइन सेवा ठप हो गइल बा। आउटेज ट्रैकर डाउनडिटेक्टर के मोताबिक, मंगर के दुपहरिया 1:44 बजे IST पs नेटवर्क डाउन होखे के रिपोर्ट आवे लागल। जानकारी के मोताबिक ई दिक्कत कवनो एगो कंपनी के सर्वर के नइखे। बलुक देसव्यापी नेटवर्क में दिक्कत हो सकत बा, जवना के चलते यूजर्स के ई समस्या आ रहल बा। Downdetector के मोताबिक अभी ई समस्या भारत में देखे के मिल रहल बा। देस से बाहर अभी कवनो देस में आउटेज के समस्या देखे के नइखे मिलल।
लोगन के एह समस्या से दु चार होखे के पड़ रहल बा। एकरा अलावे गूगल आ यूटयूबो के इहे हाल बा। कइयन गो बड़ प्रमुख शहरन में ई समस्या देखे के मिलल बा। आउटेज के मॉनिटर करे वाली साइट Downdetector के मोताबिक कइयन इलाकन में जियो ,एयरटेल, गूगल के सर्विस ठप हो गइल बा। करीब 3000 से जादे यूजर्स ऐप्स के डाउन होखे के शिकायत कइले बा लो। यूजर्स के सबसे जादे दिक्कत एक्स आ स्नैपचैट चलावे में आ रहल बा। जानकारी के मोताबिक नेटवर्क डाउन होखे से दुपहरिया करीब 1:30 बजे के आस-पास वाट्सऐप पs दिक्कत आवे लागल।
जवना के बाद से लोग सोशल मीडिया प्लेटफॉर्म एक्स पs आपन शिकायत डाल रहल बा लो। एकरा अलावे 2:45 पs आइल जियो के आउटेज रिपोर्ट फेर से 1900 के पार हो गइल। ऐप्स के अलावे अब यूजर्स के जियो फाइबर आ इंटरनेट के चलावे में दिक्कत आ रहल बा। परेसान होके यूजर्स लगातार सोशल मीडिया प्लेटफॉर्म एक्स पs आपन परेसानी जाहिर कs रहल बा लो।
कवना शहरन में दिख रहल बा सबसे जादे आउटेज
लगभग समूचा देस में आउटेज के समस्या देखे के मिल रहल बा, बाकिर Downdetector के मोताबिक चंडीगढ़, दिल्ली, लखनऊ, रांची, कोलकाता, कटक, नागपुर, सूरत, मुंबई, पुणे, हैदराबाद, बेंगलुरु, चेन्नई, गुवाहाटी में देखे के जादे मिल रहल बा।
कवना वजह से भइल ई आउटेज
अभी तक सरकार के तरफ से कवनो क्लेरिफिकेशन सामने नइखे आइल। जानकारन के मोताबिक ई एगो नेशनल सर्वर में दिक्कत होखे से ई हो सकत बा। फिलहाल अभी केहू अधिकारी एकर पुष्टि नइखे कइले लो।