US: मुंबई हमला के दोषी तहव्वुर राणा भारत ले आवल जाई भारत, प्रत्यर्पण के मिलल मंजूरी
सेंट्रल डेस्क : अमेरिकी सुप्रीम कोर्ट मुंबई हमला के दोषी तहव्वुर राणा के भारत प्रत्यर्पण के मंजूरी दे देले बा। शीर्ष अदालत ओकर दोषसिद्धि के खिलाफ समीक्षा याचिका के खारिज कs देले बा। भारत पाकिस्तानी मूल के कनाडाई नागरिक राणा के प्रत्यर्पण के मांग करत रहे, काहेकि ऊ 2008 के मुंबई आतंकवादी हमलन के ममिलन में वांछित बा।
ई राणा खातिर प्रत्यर्पित ना कइल जाये खातिर आखिरी कानूनी मवका रहे। एकरा पहिले ऊ अमेरिकी अपील न्यायालय सहित कइयन संघीय अदालतन में कानूनी लड़ाई हार गइल रहे। 13 नवंबर के राणा अमेरिकी सुप्रीम कोर्ट के समक्ष "प्रमाणपत्र खातिर याचिका" दायर कइले रहे। डोनाल्ड ट्रंप के अमेरिकी राष्ट्रपति के रूप में शपथ लेला के एक दिन बाद 21 जनवरी के शीर्ष अदालत एकरा के अस्वीकार कs देलस। सुप्रीम कोर्ट कहलस, याचिका अस्वीकार कइल गइल। राणा वर्तमान में लॉस एंजिल्स में मेट्रोपॉलिटन डिटेंशन सेंटर में हिरासत में बा।
एह आधार पs अपील कइले रहस राणा
राणा तर्क देलस कि ओकरा पs इलिनोइस (शिकागो) के संघीय अदालत में 2008 के मुंबई आतंकवादी हमलन से संबंधित आरोपन पs मुकदमा चलावल गइल आ बरी कs दिहल गइल रहे। भारत ओहि आरोपन के आधार पs प्रत्यर्पण के मांग कइले रहे, जवना के आधार पs शिकागो के अदालत राणा के बरी कs देले रहे। हालांकि, अमेरिकी सॉलिसिटर जनरल कहले रहस कि सरकार ई नइखे मानत कि जवना आचरण खातिर भारत प्रत्यर्पण चाहत बा, ऊ एह ममिला में कवर हो चुकल बा। तहव्वुर राणा अमेरिकी अपील न्यायालय सहित निचली अदालतन आ कइयन गो संघीय अदालतन में कानूनी लड़ाई हार चुकल बा। अब ऊ एह ताजा याचिका से आपन प्रत्यर्पण रोके के संभवतः आखिरी कोसिस कs चुकल बा।
अमेरिकी सरकार सुप्रीम कोर्ट से राणा के याचिका खारिज करे के अपील कइलस
बता दीं कि अमेरिकी सरकार राणा के प्रत्यर्पण खातिर तइयार बिया आ बीतल 16 दिसंबर के अमेरिकी सॉलिसिटर जनरल एलिजाबेथ बी प्रीलोगर सुप्रीम कोर्ट से राणा के याचिका के खारिज करे के अपील कइले रहस। राणा के वकील अमेरिकी सरकार के सिफारिशन के चुनौती देलें आ सुप्रीम कोर्ट से अनुरोध कइलें कि ओकर रिट स्वीकार कइल जाए। राणा के याचिका पs 17 जनवरी के सुनवाई होई। राणा, वर्तमान में लॉस एंजेलिस के जेल में बंद बा। राणा पाकिस्तानी-अमेरिकी आतंकवादी डेविड कोलमैन हेडली से जुड़ल रहे, जवन 26/11 मुंबई हमलन के मुख्य साजिशकर्तन में से एगो बा। 2008 के मुंबई आतंकवादी हमलन में छव अमेरिकियन सहित कुल 166 लोग मारल गइल रहे। एह हमला में 10 पाकिस्तानी आतंकवादी 60 घंटा से जादे समय तक मुंबई के अहम स्थानन पs हमला कइले रहे आ लोगन के हत्या कइले रहलें सs।
