छपरा से लखनऊ के बीच चली वंदे भारत ट्रेन: 25 अक्टूबर से 8 नवंबर तक चली, देखीं शेड्यूल

रेलवे प्रशासन आवे वाला त्योहार पs यात्रियन के होखे वाला अतिरिक्त भीड़ के ध्यान में रखत नया वंदे भारत ट्रेन के संचालन के फैसला कइले बा। ट्रेन संख्या 02270/02269 लखनऊ-छपरा-लखनऊ वंदे भारत विशेष गाड़ी के संचालन लखनऊ छपरा के बीच से 25 अक्टूबर से 8 नवंबर तक 13 फेरन खातिर कइल जाई। छपरा रूट से चले वाला ई पहिला वंदे भारत ट्रेन होई। ई जानकारी जनसंपर्क पदाधिकारी अशोक कुमार पत्र जारी करत देले बाड़ें। छपरा से चले वाली बंदे भारत के सब कोच कुर्सीयान होई।

ट्रेन संख्या 02270 लखनऊ-छपरा वंदे भारत पूजा विशेष गाड़ी लखनऊ से 14:15 बजे चलके सुल्तानपुर से 16:07 बजे, वाराणसी से 18:25 बजे, गाजीपुर सिटी से 19:35 बजे, बलिया से 20:25 बजे आ सुरेमनपुर से 20:57 बजे छूटके छपरा 21:30 बजे पहुंची।

बलिया-गाजीपुर के रास्ते चली ट्रेन

वापसी यात्रा में 02269 छपरा-लखनऊ वंदेभारत पूजा विशेष गाड़ी छपरा से 23:00 बजे प्रस्थान कs के सुरेमनपुर से 23:37 बजे, दूसरका दिन बलिया से 00:07 बजे, गाजीपुर सिटी से 1:01 बजे, वाराणसी से 2:35 बजे आ सुल्तानपुर से 4:50 बजे छूटके लखनऊ 6:30 बजे पहुंची।

एह गाड़ी में वंदे भारत वातानुकूलित कुर्सीयान श्रेणी के आठ कोच लगावल जाई।