गोरखपुर में बरखा के इंतजार: उमस भरल गरमी से लोग बेहाल, सावन में जेठ के गरमी के अहसास; 29 जुलाई से बरखा के आसार

गोरखपुर में लोग बरखा खातिर तरस रहल बा। जुलाई खत्म होखे के बा, बाकिर मानसून अब तक कमजोर बनल बा। मौसम के ई इस्थिति लोगन खातिर बहुते चिंता के कारण बन गइल बा। गरमी आ उमस जिनगी के मुश्किल बना देले बा आ लोग हर दिन बरखा के उम्मीद में बइठल बा, बाकिर बरखा नइखे हो रहल। एकरा बजाए, चिलचिलात धूप आ उमस भरल गरमी लोगन के जिनगी के आउर कठिन बना देले बा।

आज सनीचर के सबेरही से जेठ के गरमी जइसन अहसास हो रहल बा। मौसम विभाग के मोताबिक, आज दिन के अधिकतम तापमान 35-36°C के आसपास रही, जबकि न्यूनतम तापमान 27.1°C तक जाये के संभावना बा। एकर मतलब बा कि दिन के संगे-संगे रातो में लोगन के उमस आ गरमी के सामना करे के पड़ी।

सावन के 1 हफ्ता बीत गइलो पs ना भइल बरखा

सावन के महीना सुरू भइल एक हफ्ता हो गइल बा, बाकिर अभी ले बरखा के फुहारन के इंतजार कs रहल लोगन के निराशा हाथे लागल बा। मौसम विज्ञान विभाग से मिलल जानकारी के अनुसार, अगिला दु-तीन दिन तक बरखा के आसार कमे दिखाई दे रहल बा।

29 जुलाई से बरखा के उम्मीद

मौसम विभाग के पूर्वानुमान के मोताबिक, 29 जुलाई से बरखा के उम्मीद बा। एह दौरान आंशिक बादल छाइल रहला के अनुमान बा आ 29 जुलाई से मानसून के सक्रिय होखे के संभावना बा। अइसन में अभी दु दिन आउर लोगन के तीख घाम आ उमस भरल गरमी के सामना करे के पड़ी। लोगन के अब बरखा के बेसब्री से इंतजार बा, ताकि ओह लोगन के एह कड़ा घाम आ उमस से राहत मिल सके।

जुलाई में होला औसतन 353 MM बारिश

गोरखपुर में जुलाई महीना में औसतन 353.5 मिमी बारिश होला, जवन कि एह महीना के सबसे महत्वपूर्ण विशेषता होला। बाकिर अबकी बेर इस्थिति कुछ अउरिये बा। मौसम विज्ञान विभाग के आंकड़न के अनुसार, एह साल 26 जुलाई तक करीब 250 मिमी बरखा नइखे भइल।