पंचायत के 'बिनोद' जब साइकिल से रुई बेचत रहले तs जान लीं कि उनका सफलता कइसे मिलल

बिनोद उर्फ अशोक पाठक संघर्ष : अमेजन प्राइम वीडियो वेब सीरीज पंचायत के तीसरा भाग आ गइल बा । प्रशंसक बहुत लंबा समय से एकर इंतजार करत रहले। हालांकि बहुत सारा किरदार लोग के दिल में जगह बना लेले बा, बाकी पंचायत अभिनेता अशोक पाठक उर्फ बिनोद, जे बहुत कम समय खातिर देखल गइले आ जिनकर संवाद 'देख रहा है बिनोद' काफी मशहूर भइल। विनोद एह में गजब के काम कइले रहले आ लोग के उनकर काम बहुते नीक लागल । हालही में रउरा बिनोद के कान फिल्म फेस्टिवल में देखले होखब जहाँ उनका काम के बहुते सराहल गइल । हालांकि का रउरा मालूम बा कि अभिनेता के एहिजा चहुँपल बहुते मुश्किल रहे ।

जब बिनोद कानस पहुंचले

वेब सीरीज पंचायत से मशहूर भइल अशोक पाठक के रउरा बहुत कम समय खातिर परदा पर देखले होखब बाकिर उनकर काम हर बेर सोना जइसन शुद्ध होला आ कान फिल्म फेस्टिवल में ऊ धीरे-धीरे सफलता के सीढ़ी पर चढ़त बाड़न । ऊ रेड कार्पेट पs उतर गइले जहां लोग उनका खातीर 10 मिनट तक ताली बजावत रहले। अशोक अपना फिल्म सिस्टम मिडनाइट के प्रीमियर खातिर कानस गइल रहले आ एहिजा उनका काम के लोग बहुते सराहल गइल बा । एह दौरान अभिनेता अपना संघर्ष के कहानी साझा कइले बाड़न ।

साइकिल पर रुई बेच के कमाई करत रहले

अशोक पाठक बिहार के सिवान निवासी हवन आ पंचायत में जवना सादगी से ऊ आपन छोटहन किरदार निभवले बाड़न ऊ गजब के बा । हालांकि बिहार निवासी अशोक बचपन में अपना माता-पिता के संगे फरीदाबाद आइल रहले आ उनकर पूरा परिवार काम के तलाश में इहाँ आईल रहले। जाहिर बा कि उनकर आर्थिक हालत ठीक ना रहे अउरी 9वीं क्लास में उ अपना परिवार के खर्चा पूरा करे खातिर मामा के साथे साइकिल से रुई बेचत रहले, रोज 100 से 150 रुपया कमा लेत रहले।

इम्तियाज अली के हाईवे पs काम शुरू हो गइल

हालांकि एही दौरान अशोक आपन पढ़ाई जारी रखले आ 12वीं तक ले लिहलें आ ओकरा बाद अभिनय के ओर मुड़ के भारतेंदु अकादमी में दाखिला लिहलें। खास बात ई रहे कि इहाँ के छात्रवृत्ति भी मिलल रहे। एकरा बाद अभिनेता दिल्ली आके इंजीनियर बने के तइयारी करे लगले।। बाकिर पढ़ाई में रुचि ना रहे, तब भाई थियेटर जाए के कहले आ फेर अभिनेता के किस्मत बदल गइल आ इम्तियाज अली के फिल्म हाईवे में काम करे के मौका मिल गइल ।

एह फिलिमन में काम कइले बानी

फिल्म हाईवे से अभिनय के शुरुआत कइला का बाद अशोक पाठक के कई गो फिलिमन से ऑफर मिलल, ऊ फुकरे रिटर्न्स, खानदानी शफाखाना, सेक्रेड गेम्स जइसन सीरीज-फिलिम में काम कइले बाड़न । हालांकि पंचायत श्रृंखला से उनका एगो अलग पहचान मिलल। अभिनेता एगो साक्षात्कार के दौरान बतवले रहले कि शुरू में ऊ ई सीरीज करे के ना चाहत रहन बाकी बाद में निर्देशक के बार-बार निहोरा पs ऊ ई किरदार कइले।