विरोध-प्रदर्शन के बीच BPSC के री-एग्जाम आजु, पटना में बनावल गइल 22 सेंटर; धारा 163 लागू
बिहार के राजधानी पटना में बीपीएससी के परीक्षा के लेके एक ओर छात्र विरोध प्रदर्शन करतारे, तs दोसरा ओर आज फेर से परीक्षा हो रहल बा। बिहार लोक सेवा आयोग (बीपीएससी) आजु 4 जनवरी के पटना के 22 केंद्र में परीक्षा करावत बा। एह परीक्षा में करीब 12000 परीक्षार्थी नजर अइहें. हालांकि ई परीक्षा खाली ओह परीक्षार्थियन खातिर कइल जा रहल बा जिनका केन्द्र में गड़बड़ी भइल रहे. एकरा संगे छात्र पूरा बिहार में परीक्षा रद्द कs के फेर से करावे के मांग करतारे।
परीक्षा केन्द्र के लगे धारा 163
एकरा संगे बीपीएससी के परीक्षा के लेके पटना में सुरक्षा के कड़ा इंतजाम कईल गईल बा। एs मामला में परीक्षा केंद्र के नजदीक धारा 163 लगावल गईल बा। परीक्षा केन्द्र के लगे आजु सबेरे आठ बजे से साँझ पाँच बजे ले धारा १६३ लागू रही. धारा 163 के तहत परीक्षा केंद्र से 100 मीटर के भीतर पांच से जादा लोग के सार्वजनिक जुटान पs रोक बा। एकरा अलावे बिना अनुमति के प्रदर्शन, जुलूस अवुरी लाउडस्पीकर के इस्तेमाल पs भी रोक लगावल गईल बा। उम्मीदवार अवुरी उनुका साथी के मोबाइल चाहे स्मार्ट डिवाइस ना ले जाए दिहल जाई, हालांकि पुलिस अधिकारी अवुरी परीक्षा कर्मचारी के एs प्रतिबंध से छूट दिहल जाई।
दोबारा परीक्षा खातिर 22 गो केन्द्र बनावल गइल
बता दीं कि पटना के एगो परीक्षा केंद्र में भइल गड़बड़ी के बाद बीपीएससी फेर से ओहिजा के 12000 परीक्षार्थियन के परीक्षा आयोजित कइले बिया. हालांकि अबकी बेर एह उम्मीदवारन खातिर 22 गो केन्द्र बनावल गइल बा. एहमें से 15 गो परीक्षा केन्द्र पटना सदर अनुमंडल के तहत आवेला. ई परीक्षा ओह घरी करावल जा रहल बा जब बीपीएससी परीक्षा के खिलाफ विरोध प्रदर्शन लगातार बढ़ रहल बा. पटना में बियफे के दिने हजारन विद्यार्थी रेल आ सड़क यातायात बाधित कs दिहले जबकि कई गो छात्र संगठन मुख्यमंत्री आवास पs मार्च करे के कोशिश कइले. पुलिस के बल प्रयोग के बाद विरोध प्रदर्शन अउरी बढ़ गईल जवना में कई गो प्रदर्शनकारी घायल हो गईले।