सारण समाहरणालय में अतिक्रमण पs चलल बुलडोजर: डीएम के आदेस पs ट्रैफिक डीएसपी कइलें नेतृत्व, दुकानन पs चलल बुलडोजर

सारण समाहरणालय में ओह समय अफरा-तफरी के माहौल हो गइल, जब बुध के दुपहरिया बाद अचानक से बड़ संख्या में पहुंचल पुलिस बल आ नगर निगम के कर्मचारी अतिक्रमण हटावे लागल लो। एह दौरान रजिस्ट्री कचहरी आ पंचायती राज विभाग के सामने दुकान लगावे वाला दुकानदार आपन सामान लेके भागत नजर आइल लो। सारण समाहरणालय आ रजिस्ट्री ऑफिस के लगे पहिले से अतिक्रमित दुकानन के संचालन कइल जात रहे।

शहर सहित समाहरणालय परिसर आ आसपास के क्षेत्र में जाम आ अनियंत्रित पार्किंग के लेके अभियान चलावल जा रहल बा। एही क्रम में जिलाधिकारी के आदेस पs समाहरणालय के अतिक्रमण मुक्त करावे के उद्देश्य से अभियान चलावल गइल। अतिक्रमण हटाओ अभियान के नेतृत्व ट्रैफिक डीएसपी बसंती टुड्डू करत रहली। जेसीबी के मदद से दुकान खातिर कइल गइल स्थायी निर्माण के तुड़ल गइल।

समाहरणालय ​​​​​​​आ रजिस्ट्री ऑफिस के आसपास गलत आ बेतरतीब तरीका से मोटरसाइकिल आ चारपहिया के पार्किंग कइल जाला। शहर के आउर हिस्सन में मार्केटिंग करे वाला लोग सुरक्षा के दृष्टिकोण से समाहरणालय में पार्किंग कs के शहरी क्षेत्र में चल जाला। एह से समाहरणालय परिसर में वाहनन के भीड़ लाग जाला। सामान्य तौर पs लोगन के चले में परेसानी हो जाला।

अतिक्रमण हटाओ अभियान के जानकारी देत डीएसपी बसंती टुड्डू बतवली कि जिलाधिकारी के आदेस पs अतिक्रमण हटाओ अभियान चलावल जा रहल बा। जवना के अंतर्गत संग्रहालय परिसर में अतिक्रमित दुकानन के हटावल गइल। संगही अवैध पार्किंग कइल गइल वाहनन के जब्त कs के जुर्माना कइल गइल बा।