Paris Olympics: सात्विक-चिराग के जोड़ी के मिलल आसान ड्रॉ, एह वरीयता के संगे पदक पs दांव लगावे उतरिहें
पेरिस ओलंपिक खातिर बैडमिंटन के ड्रॉ कुछ दिन पहिलही निकलल रहे, बाकिर ओमे पुरुष डबल्स के ड्रॉ के घोषणा ना भइल रहे। अब 26 जुलाई से सुरू हो रहल एह खेलन खातिर डबल्स वर्ग के ड्रॉ के घोषणा हो गइल बा आ सात्विकसाईराज रेंकीरेड्डी आउर चिराग शेट्टी के स्टार भारतीय पुरुष डबल्स जोड़ी के अनुकूल ड्रॉ मिलल बा। थॉमस कप जीते वाली भारतीय टीम के सदस्य रहल सात्विक आ चिराग के जोड़ी के तीसरका वरीयता मिलल बा।
सुनवाई के कारण पुरुष डबल्स के ड्रॉ भइल रहे स्थगित
ड्रॉ में जोड़ियन के संख्या के लेके खेल पंचाट (कैस) के सुनवाई के कारण सुक के पुरुष डबल्स ड्रॉ स्थगित कs दिहल गइल रहे। खेल के वैश्विक संचालन संस्था के ड्रॉ. स्थगित करे के पड़ल, काहेकि कैस बैडमिंटन विश्व महासंघ (बीडब्ल्यूएफ) के आदेस देलस कि कोर्वी आ लेबर के जोड़ी के ओलंपिक खेलन में सामिल करे के के लेके अंतरराष्ट्रीय ओलंपिक समिति के सिफारिश कइल जाई। फ्रांस के जोड़ी के सामिल होखला से पुरुष ड्रॉ में सुरुआती 16 के जगह अब 17 जोड़ी होइहें सs।
सात्विक-चिराग के जोड़ी ग्रुप-सी में
स्वर्ण पदक के प्रबल दावेदार सात्विक आ चिराग के दुनिया के पूर्व नंबर एक जोड़ी के ग्रुप सी में रखल गइल बा, जहां फजर अल्फियां आ मोहम्मद रियान एरदियांतो के इंडोनेशिया के छठा नंबर के जोड़ी उनकर सबसे कड़ा प्रतिद्वंद्वी होई लो। राष्ट्रमंडल खेलन के स्वर्ण पदक विजेता सात्विक आ चिराग के जोड़ी के ग्रुप चरण में मार्क लैम्सफस आ मर्विन सीडल के जर्मनी के 31वां नंबर के जोड़ी आ लुकास कोर्वी आउर रोनन लेबर के फ्रांस के दुनिया के 43वां नंबर के जोड़ी से भिड़े के बा। ओलंपिक में बैडमिंटन स्पर्धा 27 जुलाई से सुरू होई।
सिंधू-प्रणय के मिलल रहे आसान ग्रुप
दु बेर के ओलंपिक पदक विजेता पीवी सिंधू आ एचएस प्रणय के आसान ग्रुप में जगह मिलल रहे। रियो खेलन में रजत पदक आ ओकरा बाद टोक्यो ओलंपिक में कांस्य पदक जीते वाली सिंधू के 10वीं वरीयता दिहल गइल रहे। ओहिजा, विश्व रैंकिंग में 19वां स्थान पs काबिज तनिषा क्रास्टो आ अश्विनी पोनप्पा के भारतीय जोड़ी के महिला डबल्स में मुश्किल ग्रुप सी में जगह मिलल रहे।
